أجمل قصة حب تتحدى فارق الطول والسن والتنمر.. سارة أقصر غطاسة على مستوى العالم: كنت خايفة من كلام الناس ونظراتهم لكن حبه ادانى ثقة فى نفسى.. محمد: قلبى وعقلى اختاروها وأقدر اتحدى الدنيا عشانها.. فيديو

حين تتحدث القلوب تصمت العقول، وحين يحضر الحب لا يهم الشكل أو العمر، فمشاعر الحب تطغى وتفرض نفسها، وتوثقها تجاعيد السنين حتى نهاية العمر، ساره ومحمد قصة حب تحدت تنمر الآخرين، لم يكن الـ54 سم فارق الطول بينهما حاجزا، نظرة الاحتواء من عينيه جذبتها ووهبتها الثقة فيه وفى العالم من حولها، " محمد وسارة" أحدث عروسين ملأت صورهم مواقع السوشيال ميدا بعد إعلان خطبتهما. ساره طه فتاة في الثلاثين من عمرها عاشت حياتها تعاني من التنمر بالألفاظ والنظرات عليها لقصر قامتها، الفتاة لم يتعدى طولها الـ140 سم، ولذلك السبب الخارج عن إرادتها كانت تعيش في وحدة، على الرغم من دعم أسرتها إلا أن العالم الخارجي كان أقوى، حتى قررت أن تتخطى كل كذلك وتتحرر من قيودها، حينها كانت في المرحلة الجامعية، تخطت نظرات الزملاء والمحيطين بها، أكملت دراستها في كلية الآداب، التحقت بفرقة الفنون الشعبية لقصار القامة وهى الفرقة الوحيدة على مستوى العالم، تعلمت الغطس وانفردت فيه وأصبحت أقصر غطاسة على مستوى العالم، بالإضافة إلى أنها ممثلة ومغنية صوتها الرقيق تشدو به أجمل الألحان. وكعادتها أيام الصيف تجذب الغرباء وتجمع بينهم في جلسات مرح وسعادة، منذ عام تقريبًا وفي إحدى لياليه طرقت دقات الحب قلب محمد وساره، على شاطئ" جمصه" كانت أول نظرة عاطفة صادقة تلمس قلب الفتاة الرقيقة، تقول ساره" محمد هو كل حياتى، اعرفه من 20 سنة كنا بنطلع المصيف عائلات مع بعضنا، وعمرنا ما فكرنا في الارتباط، لكن في شهر 9 اللى فات النظرة اتغيرت خالص، نشأت علاقة عاطفية بينا من غير مانحس، حنيته جذبتني وخوفه عليا أسرني، هو تعب معايا كتير لأني كنت خايفه من الارتباط، وهو فضل ورايا وكان عنده صبر غير طبيعي وهدفه أنه يخرجنى من أزمتى النفسية، حسيت بحبه وحنانه وعشقته وعشقت كلامه واصراره أنى أكون شريكة حياته، قلته كتير مش هينفع نرتبط وهنقابل مشاكل كثير وتنمر من ناس نعرفهم ومنعرفهمش، لكن هو كان مصر وقالي كلهم مايفرقوش معايا في شيء". وتابعت ساره" محمد بينادينى يا بسكوتة يا مسكرة وأنا بحب دلعه ليا، ربنا عوضني به، هو إنسان جميل وطيب وحنون جدا، براعي مشاعري في كل كلامه وتصرفاته، كتير جدًا كنت بقوله أن أطول منى وأن الناس مش هتسكت لأن طوله 194 سم، وأنا 140 سم طبعا الفرق كبير قوى فى الطول، كمان أنا أكبر منه بـ5 سنين هو عمره 25 سنه وأنا 30 ، لكن هو كان بيقولى كل ده مايفرقش معايا، أنا بحبك وهفضل أحبك طول عمرى، الناس كلها كانت متفاجئة وقالوا كلام كتير هي قصيرة عليه وهو طويل عليها، ده هيبوسها ويحطها جنب الحيط، هو أصلا مش طايل يكلمها، بس انا مابيهمنيش كلامهم مبسوطة منه وبيه، يكفينى ثقته فيا وانا بكتسب ثقتى منه". يقول محمد " بدأت قصتي مع ساره من عشرين سنه لكن تحركت مشاعر الحب بيننا من سنة، عانيت معاها في الأول كتير عشان اقنعها لأنها كانت رافضة وخايفة من كلام الناس، ولكنى اتحديت كل شيء، لأن الطول والقصر ده بتاع ربنا مش بإيد حد دي إرادة ربنا، أنا طويل وهى قصيرة وفرق السن كبير، وده مامنعنيش انى أحبها بالعكس، أنا بحب شيء فيها كلامها ضحكتها، عصبيتها، صوتها الجميل، نفسي أشوفها أحسن واحدة في العالم وأشوفها نجمة في السما، واللى بيحب حد بيحبه بكل مميزاته وغيوبه، لأن القلب هو اللى بيختار وسارة اختارها قلبي وعقلي، وأنا مابخدش قرار واندم عليه وهفضل أحبها طول عمرى".