"أنا شيراز تحب تلعب معايا".. ريم طفلة ما وراء الطبيعة لـ"انفراد":" صحابى بيقولولى مش عارفين ننام منك.. وأصعب مشهد كان الحريقة فى بيت الخضراوى.. ومابقيتش أخاف من أفلام الرعب زى زمان.. وشيراز شبح طيب

"أنا شيراز..تحبوا تلعبوا معايا؟".. هكذا دعت شيراز الطفل رفعت إسماعيل وأصدقاءه للدخول إلى منزل الخضراوى للعب معها، لتبدأ المغامرة المرعبة فى مسلسل "ما وراء الطبيعة". ورغم ملامحها البريئة وضحكتها الصافية التى استطاعت أن تخطف قلوب المشاهدين، إلا أن الطفلة "ريم عبدالقادر" التى قامت بدور "شيراز" نجحت فى إفزاع المشاهدين وتحولت إلى رمز للرعب على السوشيال ميديا. وبعد عرض مسلسل "ما وراء الطبيعة" المستوحى من السلسلة التى تحمل نفس الاسم نفسه للكاتب الراحل، أحمد خالد توفيق، والنجاح الذى حققته الطفلة بموهبتها الواضحة فى المسلسل، تحدثت إلى "انفراد" عن كواليس المسلسل واستعدادها لتجسيد شخصية شيراز وتفاصيل أخرى. فى البداية ..ماهو عمرك ؟ أنا ريم عبد القادر، عندي 7 سنين وبدأت تصوير مسلسل "ما وراء الطبيعة" من وأنا عندي 6 سنين. كيف اكتشفت موهبتك فى التمثيل؟ وطورت من أدائك؟ قالت ريم :"أنا بحب التمثيل جداً، واخواتي بدأوا التمثيل قبلي وكنت بحضر معاهم الاختبارات، وبدأت أعمل فى مجال الإعلانات ومن هنا، بدأ يجيلي أدوار مختلفة، ومن خلال الأدوار اتعلمت التمثيل أكتر، وبشتغل على نفسى عشان أكون ممثلة شاطرة وأعمل أدوار مختلفة ومهمة لما أكبر. ماهى أول تجاربك فى التمثيل ؟ وكم كان عمرك ؟ أضافت ريم :"بدأت التمثيل وأنا عندي 4 سنين ومثلت أول دور في مسلسل "لمعي القط" مع أستاذ عمرو عرفة ومحمد إمام، وكانت تجربة حلوة جداً واتبسطت في التصوير. ماهى الأعمال الفنية التى شاركت فيها قبل "ما وراء الطبيعة" ؟ بعد "لمعي القط"، بدأت أمثل فى أدوار أكتر وعملت، مسلسل "سك على اخواتك" و"قمر هادي"، و"هربانه منها" و"شبر ميه" وحاجات تانيه كتير وآخرهم كان مسلسل "ما وراء الطبيعة" وقريباً هينزل فيلم "ريما". كيف استعددتِ لشخصية "شيراز" ؟ قالت ريم :"دور شيراز مكانش سهل وعشان كده، أخدنا وقت كافي جداً عشان نحضر للدور، وعملت بروفات كتير مع أستاذ عمرو سلامة، على الحوار "سكريبت"، وكان مطلوب منى أتكلم زي شيراز في أي سؤال بيسألهولى، وكمان عملنا بروفات كتير للميكب بتاع شيراز ولبسها، لحد ما استقر أستاذ عمرو على شكل شيراز اللى شوفتوه في المسلسل، مش كدا بس ، كل الممثلين كانوا بيساعدوني وبيشجعوني دايماً وكنت دايماً بتمرن على "الاسكريبت"، مع ماما وأختي عشان أتأكد إني فاهماه كويس أوي. ماهو أصعب شىء واجهتيه أثناء التحضير لدور "شيراز"؟ كان في حاجتين صعبين جداً، أول حاجة الميكب، اللي كان بياخد وقت طويل جداً، قبل كل مشهد بيتصور، عشان كده كنا بنقعد 3 ساعات عشان نحط الميكب، وساعتين تانيين عشان نشيله، ولكن أنا عشان بحب الشخصية أوي فكنت بستحمل ودنيا وإسلام اللي كانوا بيحطولي الميكب، كانوا دايما بيشجعوني ويحاولوا يخلوا الموضوع سهل عليا، وتاني حاجة كانت أماكن التصوير الصعبة زي التصوير في الصحراء ومشاهد صعبة زي مشهد النار. ما هو أصعب مشهد نفذتيه فى المسلسل ؟ أصعب مشهد كان مشهد الحريقة في بيت الخضراوي، كنت خايفة شوية بس كانوا عاملين احتياطات أمان وأستاذ عمرو سقفلي وقال لي"انا مش عايزك تمثلي مع حد غيري" وساعتها كنت مبسوطة جداً جداً عشان قالي كدا". بتحبى أفلام الرعب ولا بتخافى منها وإيه أكتر فيلم بتحبيه؟ أنا لما بتفرج على فيلم رعب مش بخاف أوي بس لما أجي أنام مش بعرف.. بس عامة تجربتي في مسلسل "ما وراء الطبيعة" خليتني أتشجع عشان أول مرة أعمل دور في مسلسل إثارة ورعب، وكمان دور جديد بالنسبالي فابتديت أحب أفلام ومسلسلات الرعب أكتر. مين مثلك الأعلى فى التمثيل؟ وليه؟ فيه كتير ممثلين وممثلات بحبهم بس، أنا اللي يهمني إن الناس تحبني وتحب شغلي، ومش مهم أبقى زي حد.. بس التشجيع والمساعدة اللي لقيتهم من كل الممثلين وفريق العمل في مسلسل "ما وراء الطبيعة"، خلوني أحب كل الممثلين هناك ومن ضمنهم أحمد أمين عشان أكتر واحد صورت معاه وكان دايماً بيضحكني ساعة التصوير واتبسطت معاه جداً وكمان رزان وأية كانوا بيلعبوا معايا وبيقولولي إزاي إني بعمل الدور حلو أوي و يقولولي قد إيه أنا شاطرة. ماهو رأيك فى رد فعل المشاهدين على دورك فى المسلسل؟ مبسوطة جداً بردود الأفعال ومتفاجئة من التفاعل العالي مع شيراز وحب الناس ليها وإنهم فاهمين للي كانت بتعمله في المسلسل، أنا اتبسطت جداً إني لعبت دور شيراز وكنت جزءا من المسلسل ده. نفسك تكملى فى أدوار الرعب ولا عايزة تعملى أدوار مختلفة ؟ شخصية شيراز أكيد خلتني أحب أدوار الرعب ولكن أنا بحب التمثيل وممكن أعمل كل الأدوار كوميدي وتراجيدي ودراما ورعب.. لكن المهم الدور يكون حلو. كيف كان رد فعل أصدقائك على دورك فى المسلسل؟ وكيف تعاملت معهم ؟ مكانوش عارفين أوي هي شيراز طيبة ولا شريرة، وده عشان هي كانت في الأول بتظهر لرفعت وطه علي شكل شبح وبتخوف طه وبعدين شافوها وهي بتلعب استغماية وكانت دايماً بتحاول تلعب مع رفعت وأصحابه، و لكن شيراز في الآخر شخصية طيبة عشان كانت بتظهر لكل الناس اللي حوالين رفعت عشان بتحاول تساعده.. بس في الآخر صحابي قالولي "مش عارفين ننام منك ياشيراز". نفسك تكونى إيه لما تكبرى؟ إن شاء الله هكمل في التمثيل وأبقى ممثلة شاطرة جداً.