سادت حالة من الغصب بين أهالي محافظة الغربية بسبب اختفاء السكر من المحلات والسوبر ماركات ومعارض السلع المدعمة التي تقيمها الدولة تحت إشراف مديرية ومباحث التموين والمحافظة.
وقالت "نادية عبد الواحد " لي يومين بدور على سكر في المعارض مش موجود، وفي السوبر ماركت بواسطة ومحسوبية، وكأن السكر بقي سلع ممنوعة، مناشدة المسئولين بتوفير السكر في التموين حسب عدد أفراد الأسرة.
وأضافت " فادية حسن " من سكان مدينة طنطا، السكر موجود في بعض المحلات بس بـ 12 جنيها وده حرام ميرضيش ربنا وفي المعارض ديما مش موجود ولما نسأل ونقول هييجي امتي عشان ننتظر يكون الرد لسة خلصان.
بينما أكد عبد الخالق أبو شادي أن المعارض مفيهاش سكر غير للمحاسيب والمعارف على حد قوله والسوبر ماركة غالي نار والتموين فيه سلع تونة وجبنة ولانشون ومكرونة، مش عايزين السلع دي عايزين سكر وزيت وقال نصا " ارحمونا يرحمكم الله ".
وقال محمد السعيد صاحب بدال تمويني المخازن مفيهاش غير سلع غير مستهلكة والمواطنين مش محتاجينها وإحنا في مشاكل يومية، والناس عايزة السلع الثابتة التي اعتادوا عليها أهما السكر والزيت والأرز.
وأشار ناجح إبراهيم أحد المشرفين على معارض السلع الغذائية المدعمة أن الحكومة تعمل فعليا على توفير السكر بشكل دوري وثابت ولكن الإقبال شديد جدا وطن السكر لا يتحمل ربع ساعة في العرض وبيخلص والأهالي مبتحرمش.
على صعيد آخر، فاجأ اللواء أحمد ضيف صقر محافظ الغربية العاملين بمنفذ بيع السلع الغذائية بشارع الجيش بطنطا للاطمئنان على توافر المعروض من السلع وجودتها وان البيع يتم بأسعار مخفضة.
والتف العشرات من المواطنين حول المحافظ بالمواطنين وطالبوه بزيادة المعروض من السكر، وطالبهم المحافظ بشراء ما يحتاجونه وعدم الشراء بكميات للتخزين.
ووجه العاملين بالمنفذ بحسن معاملة الجمهور والاهتمام بنظافة المنفذ ومراجعة تاريخ الإنتاج، والانتهاء لكل سلعة موجودة داخل المنفذ.