ينشر "انفراد" أقوال الحاج "السعيد شيشع"، المعروف بـ"عم السعيد"، البالغ من العمر67 عاما، فى واقعة التعدى عليه من قبل بلطجى حاول سرقته، اسفرت عن اصابته بـ 35 طعنه و 135 غُرزه فى الوجه والصدر بمنطقة المنزلة الدقهلية .
وقال " السعيد شيشع" خلال تحقيقات النيابة، أنه قبل الواقعة بثلاثة أيام توجه الى مكتب بريد المنزلة للحصول على معاشه الذى يبلغ 950 جنيها، يقوم من خلاله بسد احتياجاته خاصة بعد ارتفاع الأسعار لأنه يعيش بمفرده فى بيته" .
وأضاف "عم السعيد": "بعد ما قبضت المعاش روحت قعدت على القهوة شربت شاى وحجرين معسل، وقمت أحاسب بعد ما خلصت، ساعتها طلعت الفلوس من جيبى، كان فى واحد اسمه حمدى قاعد وشافنى وأنا بلطع الـ1000 جنيه من جيبى وبحاسب، قام قالى يا عم سعيد فى حد بيوزع بطاطين وحاجات خاصة بالبوتاجاز، وده مجاناَ من غير فلوس أيه رأيك أجيبلك بطانية معايا، رديت وقولتله ماشى ربنا يجزيك خير" .
وأكد "عم السعيد": "قبل ما احاسب وأمشى طلبتله شاى ومعسل وحسبتله عليهم، قمت رايح لحد كنت مستلف منه 400 جنيه وسددت اللى عليا، واصبح معايا 600 جنيه، وروحت على البيت، وتانى يوم لقيته قاعد على القهوة قولتله فين يا حمدى البطانية اللى قولتلى عليها مردش عليّ، يومها فضلت قاعد على القهوة لغية الساعة 11 بليل" .
وتابع: "قمت روحت ودفعتله الحساب زى المرة اللى فاتت، وبعد ما وصلت الشقة بنصف ساعة، لقيت الباب بيخبط لما سألت مين، قالى أنا حمدى يا عم السعيد جبتلك البطانية أفتح خدها، رحت فاتح وخدت منه البطانية وشكرته وعزمت عليه يدخل يشرب شاى وبمجرد ما التفت ورايا، لقيته راح مطلع سكينه ومطواة من جيبه، وفضل يغُزنى بيهم ويقولى هات 5 الأف جنيه حالاَ" .
وأوضح: "قولتله يابنى أنا هموت أرحمنى، قمت مسكت ايده وقولتله أنا مش معايا المبلغ ده، قولتله أنا مش معايا غير 600 جنيه، فضل يضرب فيَ بالسكاكين، وقالى هات اللى معاك، قمت مشاورله على مكان الفلوس، وخدها وسبنى انزف من كل حته فى جسمى ومشى لدرجة انى اغمى علىّ، ومافوقتش غير وأنا فى المستشفى بعد ما الجيران اسعفونى، وده اسفر عن اصابتى بـ 35 طعنه و 135 غُرزه فى الوجه والصدر " .
