رد رامى ربيعة مدافع الأهلى، ومحمد إبراهيم لاعب الزمالك، على الشائعات التى تروج فى الفترة الأخيرة، حول وجود تفرقة بين لاعبى القطبين، والفصل بينهم فى معسكر الفراعنة، مؤكدين أن ما يتردد مجرد شائعات ليس لها أساس من الصحة.
قال ربيعة ضاحكًا: "محمد إبراهيم كل يوم أنيمه على علقة، وأصحيه على علقة، ونايمين على سرير واحد وخانقنى، وكل شوية يتقلب ويضربنى".
وأضاف ربيعة خلال تصريحاته لبرنامج "الملاعب اليوم" :"كل اللى بيتقال عن الفصل بين لاعب الأهلى والزمالك كلام مالناش دعوة بيه خالص، إحنا دلوقتى فى منتخب مصر، ومحمد إبراهيم معايا من وإحنا صغيرين، وهو أكبر منى وكنت بروحلهم منتخبهم وأنا بالنسبة لهم عيل صغير، وإحنا من صغرنا مع بعض سواء أهلى أو زمالك أو إسماعيلى أو أى فريق تانى، ومافيش مشاكل بينا، وزى الأخوات طالعين من صغرنا مع بعض".
من جانبه قال محمد إبراهيم: "منتخب مصر يعنى لا تعليق، وكل واحد بيتمنى يكون موجود هنا، وكل واحد يحب النادى بتاعه، ويقاتل علشانه، لكن بعيد عن منتخب مصر، وهنا كلنا لاعبى المنتخب، وبنلعب باسم كل المصريين".