أكد عبد الواحد السيد حارس مرمى الزمالك السابق، أنه عقد جلسة سابقة مع بعض مسئولى القلعة البيضاء من أجل التفاوض على مستحقاته المالية المتأخرة، إلا أنه فوجئ بعرض سداد مليون ونصف المليون جنيه من أصل مستحقاته المتأخرة البالغة 7 ملايين و300 ألف جنيه، وقالوا لى: "هو ده اللي عندنا وإذا كان عجبك".
وقال عبد الواحد فى تصريحات لـ "الملاعب اليوم": "الزمالك تعنت كالعادة ورفض منحى مستحقاتى، وقالوا لى روح خد فلوسك من ممدوح عباس، ومش معنى إنى صبرت 4 سنوات يضيع حقى، وحالياً أنا شايف اللاعبين مش بيصبروا لو تأخر ليهم 25% بس من مستحقاتهم، ومسئولو الزمالك هم من صعدوا الموضوع للمحكمة الرياضية والأمر هنا سيختلف لأن المحكمة الرياضية تختلف عن اتحاد الكرة ولن تتقاعس أمام الأهلى أو الزمالك".
أضاف حارس الزمالك السابق، خلال تصريحاته لبرنامج "الملاعب اليوم" الذى يقدمه طارق يحيى: "بالنسبة لى أرغب فى الحل الودى، وماكنش عندى مشكلة فى التفاوض، لحد ما الزمالك سدد المبلغ فى المحكمة، ومش فارق معايا يتحكم لى بكثير أو قليل، لكن اللي فارق معايا كلام الناس اللى بتقول مش هتعرف تعمل حاجة ومش هتاخد حقك ونبرات التهديد، ويبقى أنا راجل مالوش لازمة لو معرفتش أخد حقى فعلاً.. لكن أنا هعرف أخد حقى كويس وكويس أوى.. وبكرر أن الزمالك هو اللي مصعد المشكلة مش أنا، وماكنتش أتمنى تعريض بيتى للعقوبات".
تابع عبد الواحد: "بقالى 3 سنين مش بخش نادى الزمالك، رغم إنى بقالى فيه 23 سنة، وده أمر مش طبيعى، وعندى لاعبين فى جنوب سيناء ممتازين مش عارف أقدمهم للزمالك، علشان مايتقلش أنهم تبع عبد الواحد".