روت الفنانة نادية شكري ذكرياتها في مسرحية العيال كبرت قائلة: "كنا زي الإخوات بجد، ومرة أثناء الكواليس حد كان قاعد في أول صف كان عمال يعاكسني، فقلت لـ سعيد صالح، واللى كان معروف بجدعنته جدا، وبالفعل ما اترددش فجأة قالى سيبهولى وفرج عليه كل الموجودين أمام أعين كافة الحضور".
وأضافت عن سعيد صالح، أثناء حلولها ضيفة على برنامجواحد من الناس: "الله يرحمه لحد قبل وفاته كان كل ما يشوفني يزفني بالإفيه الشهير يا بتاعة ممدوح، ويقولي حد كان يقوله لأخته كده بذمتك".
كما استرجعت الفنانة نادية شكري ذكريات صداقتها مع الفنان الراحل أحمد زكي، قائلة: "كنا زمايل من أيام المعهد، وده خلق صداقة بينا، ظهرت في حاجات كتير، سواء مسرحية العيال كبرت أو لما جالنا البيت وانا متجوزة سامي العدل، وقالى انا جاي افرح اختي، اني عامل فيلم مهم جدا لازم تشوفيه، وهو فيلم (شفيقة ومتولى)".
وأضافت: "مرة خلال كواليس مسرحية العيال كبرت جه احمد زكي وفجأة وأنا بحط ميكب بيكلمني برد عليه عادي قام قايلى انتي مش مهتمية ليه، فضربني بالقلم لدرجة إني عيطت وبكيت جدا، فقالى تصدقى شكلك قمر وانتي معيطة، فضحكت، واحمد كان ليه حاجات كده غريبة".
وتتحدث نادية شكري خلال اللقاء عن كواليس أشهر أدوارها "سوسو السكرى" بمسرحية العيال كبرت، فضلاً عن كشف العديد من الأسرار في حياتها الفنية، وتكريمها بمهرجان القاهرة للدراما.
كما تكشف عن سر ابتعادها لفترة طويلة عن الفن وهجرتها لأستراليا بعد النجاح الباهر لمسرحية العيال كبرت، ودخولها المسرحية بالصدفة، كما تحكي سر تصالحها مع والدها بعد خصومة لفترة كبيرة بعد مسرحية العيال كبرت، وعن زواجها من الفنان الراحل سامي العدل ثم الانفصال ومدي تأثيره عليها.