ألقى الشاعر مصطفى إبراهيم قصيدته "أنا بكبر" وذلك أثناء حفل توزيع جائزة أحمد فؤاد نجم لشعر العامية، والتى فاز بها لعام 2020، عن ديوانه "الزمن" الصادر عن دار الكرمة، وذلك فى حفل أقيم مساء أمس بالجامعة الأمريكية بالقاهرة.
وتقول كلمات القصيدة:
فى الأيام الصعبة وأنا شحط
بفتكر الأيام الصعبة وانا عيّل
وبقول عديتهم وانت قليّل
مش هتعديهم دلوقت؟
ولو الأيام غير الأيام..
والدنيا غير الدنيا..
انت كمان دلوقتى زمانك واحد تاني..
او واحد تالت
انا بكبر..
والعالم بيقول لى أكبر و انا ساكت
بيقول لى كل ده عادي
وان انا بكبر ف معادي
ومفيش شيء يستدعى الأزمة
والحزن الفاضى ملوش لازمة
وبص لغيرك..
حطّيت نفسى ف جزمة غيري
بس لقيتنى ف نفس الجزمة
ولقيتنى بنفس القلب
ولقيت العالم كله بيجرى حواليا من نفس الكلب
ولقيتنى ف بحر الخايفين
تايه ووحيد
مش لاحق اراجع مع نفسى انا مين
خايف من بكره و خايف أتغيّر
.....
انا الزبون الدائم للمطاعم اللى بيسهروا لمتأخر
صديق كلاب المنطقة من غير أسامي
شهوانى و ملول
وعدو الناس اللى بتتكلم علطول
تلميذ خيبات الأمل المتتالية
ومن أنصار الباب المقفول
بعرف اقول معرفش
وبعرف اقول شكراً
وبعرف اقول للشعب العامل دُمتُم ذخراً
وبقول للشعب العطلان معلش..
انا حاسس بيك
بتمنى الدنيا تدّينى و تدّيك
بتمنى الدنيا تفهمنا واحد واحد
أو تستنانا لحد ما أحزاننا تفارقنا
بحلم زيّك أعيش مرتاح..
وأعيش إنسان
وبحلم يوم ما نلاقى طريقنا
تفضل حاجة ما بيننا
إحنا كمان
مش للبيع..
ولا للنسيان