تعاقد محمد المصرى، المدير العام لدار "الرسم بالكلمات" للنشر والإنتاج الإعلامى، مع الكاتب الشاب الدكتور عزت صبرى، لإصدار كتاب "كده بالطو" التى سيتم إطلاقه فى معرض القاهرة الدولى للكتاب 2017.
وقال الكاتب، فى تصريحات خاصة لـ"انفراد"، إن الكتاب ساخر بالدرجة الأولى ويستعرض مواقف المستشفيات فى مصر، ومواقفه هو شخصيا مع المرضى أثناء استقبال الطوارى المليئة بالمواقف الكوميدية والغريبة.
وأشار "صبرى" أن الكتاب مزود برسومات كاريكاتيرية ساخرة للفنانة التشكيلية "عبير وارث"، معبره عن المعنى الحقيقى للمواقف التى يمر بها أثناء عمله بالمستشفى.
ونستعرض أجزاءً من الكتاب:
"مبدئيا دى مش مقدمة.. اعتبروه مجرد تنويه أو شرح سريع للدنيا اللى هتقابلوها جوه الكتاب ده.. الكتاب مش مادة علمية.. لو أنت فاكر أنك بعد ما تقرا الكتاب ده هتطلع بحاجة مفيدة ! تبقى غلطان.. إحنا مش جايين نضيف للأدب شىء ولا حتى لقلة الأدب.. ببساطة شديدة الكتاب ده تافه جدا هتخلصه وتكتشف انك مخرجتش منه بشىء غير حبة ضحك.. وده تقريبا بقى شىء صعب فى زمانا الأغبر اللى عايشينه.. فخلينا نخش فى الموضوع على طول".
"استقبال الطوارئ هو دايما المسرح اللى بيشهد المسرحيات الهزلية والمبكية ولأن الكتاب واخد اتجاه ساخر فانا قررت أرصدلكم بس الهزل لحين صدور النسخه الحزينة منه انت كدكتور استقبال طوارئ بتتعرض لكل ده كونك بس قاعد على مكتبك"
- سماعليقوا الحمام منين لو سمحت؟
- سماعليقوا الكافتريا فين؟ !
- سماعليقوا اختى جت هنا؟ !
- سماعليقوا عازه ضاكطور الرومتيزن لأمى
- سماعليقوا بنت خالتشى لسه والدة ألاقيها فييين؟ !
- سماعليقوا فيه جبنه براميلى؟ !
- دماااااغاااااااااى ودينى معاسيبو إنجز خيطهالى عشان أروح اطلع تييت أمه
- سماعليقوا.. إلحقونى بطنااااااااااى
* بتقلع البالطو وبتخرج تجرى ف الشارع والمستشفى كلها بتجرى ورايا تقولك سماعليقوا * "
وجدير بالذكر أن عزت صبرى قد بدأ عمله فى فبراير 2014 كتدريب فى مستشفى سرطان الأطفال 57357، ويعتبر كتاب "كده بالطو" هو ثالث أعماله الأدبية بعد كتاب "زيزوفرينيا" ومشاركته فى كتاب مجمع بإسم "3 فاز" هادفا منه استعراض المواقف الكوميديا والغرابة التى تتم فى قسم الاستقبال بالمستشفى.
