مفطّراتى لـ سعيد شحاتة.. الحلقة 26

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يا الله يا مأدّناتى ادّن وكبّر.. الفول مشبّر والباميه.. تسلم.. إيدين مراتى يا شيخنا يا الله... روح المُصلا قول للى قاعد وللى صلّا ابن الذين «خرّب ما خلا» إرهاب ونيّه... سوده و«رديّه» أشكال غريبه ووشوش غبيّه بس إحنا برضه.. رغم اللى حاصل قادرين نغنّى... ونقوم نواصل هذا أوانى.. والشعر فاصل لفّيت حوارى.. ساعة العصارى ومشيت أغنّى فوق الكبارى: ............. إيدى ف إيديكى ومعالم ضحكتى ف جوفك والقلب مركب بيتمايل على كفوفك يا صمام أمانى وإيمانى وخوفى من خوفك شايفك وخايف لـغيرى ف كلمتى يشوفك وعشان كدا بأرسمك وأتدارى فى حروفك عايش بحسّك وماشى بأغنى لكسوفك وإن مُتّ هأفرح قوى لو متّ بسيوفك يا كلمه وقت الصداع ونهار ونور ودراع يا قبلة اللى اشترى ودوّامة اللى اتباع يا فرحه يا شراع يا مدنه يا ورده لضيوفك ضمّى القتيل اللى فيّا وتمّى معروفك ............. مفطّراتى.. ماشى بآلاتى ويّايا طبله ومغنّواتى بنقول له يا الله يا مأدّناتى ادّن وكبّر.. الفول مشبّر والباميه.. تسلم.. إيدين مراتى