سألنا الشباب إيه أغرب حاجة شفتوها فى القايمة؟ الدباديب ومشابك الغسيل الأبرز

"إحنا بنشتري راجل" كلمة يكررها أهل العروس عند استقبال الشاب المتقدم لخطبة ابنتهم، ويؤكدوا أن الأموال لا تشتري رجالاً يحافظون على بناتهم ويكونون لهن الظهر والسند في الشدائد، إلا أن هذا لا يمنع الأهل أنفسهم من محاولة تأمين الابنة ماديًا بعدة تدابير أبرزها قائمة منقولات الزوجية التى أحيانًا ما تكون مجرد توثيق للواقع ولكل ما أنفقته أسرة الفتاة فى تجهيز بيت الزوجية، وأحيانًا ما تحمل الكثير من المبالغات لرفع قيمتها قدر الإمكان، لذلك سألنا الشباب عن أغرب الأشياء التى فوجئوا بكتابتها فى قائمة المنقولات الزوجية. الشباب: "اللي شاري بيمضي، وعلى قدنا نجيب": "الهدايا والدباديب" كانت أغرب ما رأه حسين . م صاحب الـ 40 عامًا فى قائمة المنقولات، وقال لـ"انفراد": "كانت من أغرب مشاكل القايمة اللي شفتها، واحد صاحبي رفض يمضي عشان خطيبته كاتبة الهدايا اللي جايبها لها حتى الدباديب". واستطرد "من الأفضل أن يتم الاتفاق على تلك النقاط منذ بداية التعارف بين العائلتين حتى لا يحدث صدام وقتها أما أن تنتهي الخطبة أو يتم الأمر على غير رضا طرف منهم، وأنا عن نفسي مضيت على قائمة المنقولات الخاصة بزوجتي دون النظر لها، لأني عارف أهلها وهي بنت حلال تستاهل أني أمضي لها على حياتي". وعن قيمة المنقولات وتضارب سعرها الفعلي مع سعرها في القائمة قال أحمد. خ صاحب الـ 35 عامًا "فوجئت بقيمة مضاعفة للأسعار بحجة أن ده تأمين لمستقبلها، وعند شرحي لسبب رفضي أني أمضي على الكلام ده باظت الجوازة وقالوا أني بياع"، وتابع: "كانوا كاتبين مشابك الغسيل في القايمة لحد ما وصلوها لمليون جنيه، أو مرة أشوف مشابك الغسيل في قايمة". أما عن محمد . س صاحب ال 50 عامًا قال: "عندي بنات وأولاد واللي مرضاهوش على الناس مرضاهوش على أهل بيتي"، وتابع: "الأصول وضمان الحقوق محدش بيعترضها، أهم حاجة كله يبقى بالاتفاق وبلاش مبالغة في شراء الجهاز من البداية" وأضاف: "نفسي الدنيا تتسهل زي زمان ايام ابويا وامي كان الواحد ممكن يتجوز بحصيرة وباجور جاز وهو اللي بيبقى مشتريهم، والست تروح بيتها بفستان فرحها بس، ولا ضغط عالشباب ولا ضغط على الأهل". البنات يعلقن: "حقنا ومفيش مبالغة من ولاد الأصول" آية. ز صاحبة ال 30 عامًا قالت في حديثها لـ "انفراد" إن الشروط من البداية تجعل جميع الأطراف على نور، وتقلل التعرض للمشكلات، وتابعت: "قائمة المنقولات بتاعتي مكتوب فيها الخشب والمفروشات والاجهزة الكهربائية والذهب، ده غير المؤخر لأني ساعدته في حاجات كتير في الجهاز"، وأضافت: "من أغرب الأشياء اللي شوفتها بتتكتب في القايمة الأدوات البلاستيكية الخاصة بالحمام والمطبخ، أه هم بمبلغ لكن مش للدرجة دي" ، وتابعت: "اللي بيبيع بيقى عاوز يخلص من التاني بأي شكل مش هيفرق معاه قايمة ولا غيره" سندس. م صاحبة الـ 34 عاما قالت إن قائمة منقولاتها مدون فيها كل شيء "من الأبرة للصاروخ" على حد تعبيرها، قائلة: "مش بنكتب مؤخر والقائمة بتعوض المؤخر حالة الطلاق لا قدر الله"، وتابعت: "والله لو مكتوب فيها ملايين ومش مرتاحة هسيبها وأمشي، خسارة قريبة ولا مكسب بعيد" أما مروة. م صاحبة الـ 30 عاما قالت إن ولاد الأصول لا يبالغون في وضع قيمة القائمة قائلة: "انا تجوزت من غير قائمة، وكان الاتفاق نجيب كل حاجة على قد مقدرتنا"، وتابعت: "اغرب الاشياء للي شوفتها مكتوبة في قائمة وكانت العروس فخورة بكدة هي الملابس الداخلية من لانجري وغيره بحجة انها براندات وغالية ولو اتطلقت لازم يجبلها غيرهم"، وأضافت أن من المفارقات أن تلك العروس انفصلت دون أن تأخد "شراب" واحد بعد الضرب والإهانة.