طلاب طب المنيا يحتفلون بتخرجهم على الطريقة الفرعونية: الطب أصله مصرى

بأزياء وإكسسوارات ذات طابع فرعوني، احتفل طلاب الدفعة 32 بكلية طب المنيا بتخرجهم على الطريقة الفرعونية، اعتزازًا بالحضارة المصرية القديمة ولمحاكاة موكب المومياوات، واحتفاء بتاريخ المصريين القدماء في الطب. وقالت "لوسيا نشأت" صاحبة فكرة حفل التخرج لـ"انفراد": "أحنا في البداية كنا حابين نعمل سيشن بمناسبة تخرجنا، وفكرنا في أكثر من فكرة بس أكثرهم قبولا كانت فكرة السيشن الفرعونية، وهي أننا نظهر بالزي الفرعوني المصري لأكثر من سبب أولاً اعتزازًا بتاريخ بلدنا و أصل تاريخنا لأن الحضارة الفرعونية أعرق حضارة علي مر العصور، وكمان لأننا أعجبنا جدًا بموكب المومياوات الذهبي وهو اللي الهمنا وشجعنا أكثر، بجانب إن الفراعنة كانوا من أوائل من عرفوا الطب في العالم، فدة يخلينا لينا الشرف إننا نمثل حفل تخرجنا علي هذه الطريقة المصرية العظيمة ونفتخر ببلدنا". وعن الكواليس قالت: أخدنا وقت كبير ومجهود عشان نعرف نختار اللبس والاستايل والإكسسوارات الفرعونية، وكان التحدي إننا نعرف نخلق وقت يناسب الجميع، ولكن اللبس كل حد صممه مع نفسه وفي حاجات اشتريناها جاهزة وقلنا كل حد يبدع في اختيار لبسه بحيث كل واحد يأخذ حريته في اختيار القماش أو التكلفة". فيما مدحت عيد مصور سيشن الفراعنة لـ انفراد: "الفكرة مش فكرتي لكن هم اقترحوها عليا وتحمست جدًا ليها، وبدأنا نتناقش في وضعيات السيشن ومكان التصوير، ماعرفناش نصور في مكان أثري لكن اخترنا مكان بديل يكون شبه الأماكن الأثرية قدر الإمكان".