مش بس ورد.. "هبة" بتصمم بوكيهات من الموز والمانجة والمكرونة هدية للحبايب

اعتدنا على رؤية باقات الزهور بمختلف أنواعها وأشكالها والتى يهديها الزوج لزوجته أو الحبيب لحبيبته وكذلك أو أحد الأشخاص يهديها لصديقه، لكن فى الفترة الأخيرة، رأينا باقات مختلفة من الأطعمة مثل الدجاج والحمام والشيكولاتة، وأخيرًا باقة الفاكهة المكونة من الموز والتفاح وغيرها من أنواع الفواكه المختلفة التى تضيفها هبة الله أحمد، فى باقاتها. هبة تصمم بوكيهات من الموز والمكرونة تحدثت هبة الله أحمد، خريجة كلية الإعلام، ومصممة باقات من الفاكهة والتى تحدثت عن اتجاهها للعمل فى هذا المجال، حيث قالت لـ"انفراد": "أول ما تخرجت اشتغلت فى عروض مسرحية للأطفال وأسست فرقه لعمل شو عرائس لحفلات المدارس وأعياد الميلاد وأتخصصت في تزيين أي مناسبة زى أعياد الميلاد والأفراح وتجهيزها بالكامل مع عمل أفكار الهدايا بالورد والشيكولاتة، وأنا بعشق شغل الهاند ميد و بقدر الإبداع و الفن والخروج عن الروتين وبحب لما أزور حد اشترى هدية مميزة ومفيدة، فقررت أمزج الورد والشيكولاتة والفواكه كمان". تابعت: "بعمل بوكيها ورد وشيكولاتة وفاكهة وخزين البيت، وأسعار البوكيهات بتبدأ من أول 200 جنيه وبتزيد حسب طلب العمل، وأكثر بوكيه بيطلب منى هو بوكيه الورد والشيكولاتة". وعن عملاء هبة، قالت: "زباينى شباب وكبار فى السن، وبيشتروا منى البوكيهات فى المناسبات المختلفة زى زوج لزوجته أو خطيب لخطيبته سواء بمناسبة عيد الحب أو عيد ميلاد، وغيرها من المناسبات وكمان بيطلب منى شغل فى حفلات المعاش". تواجه هبة بعض الصعوبات فى عملها، حيث قالت:"الصعوبات اللى بتقابلنى إن مش كل الناس بتقدر النوع ده من الفن وكمان ظهرت ناس كتير بتشتغل في المجال ده لمجرد الربح مش عشان الفن والإبداع". تحلم هبة بتحقيق الكثير من أمنياتها على أرض الواقع والتى تحدثت عنها قائلة: "نفسي يكون عندى مكان كبير لتنظيم الحفلات وبوكيهات الورد والهدايا".