بسبب زيادة عدد الغدد الدمعية لدى المرأة وغرازة إفرازها فإن المرأة، وفقًا للعلم، أكثر بكاءً من الرجل، فحسب دراسة ألمانية تبكى المرأة بين 30 و64 مرة سنويًا مقابل 6 إلى 17 مرة للرجال، وهذا لا يعنى أبدًا أن المرأة أكثر كآبة أو أكثر ميلاً للنكد كما يعتقد الرجال، وإنما، حسب الدراسة نفسها، هذا هو السبب فى أن المرأة أقدر على ضبط النفس من الرجل لأنها تخفف من التوتر العصبى من خلال البكاء.
أسباب البكاء لدى النساء وحيلتهن هذه للتنفيس عن مشاعرهن السلبية والتوتر والضغوط التى يعانونها متعددة وكثيرة، وتتراوح بين القوية فعلاً والأسباب الغريبة، وحول هذه الأسباب الغريبة للبكاء تحدثت الفتيات على موقع التواصل الاجتماعى "فيسبوك" عن أغرب سبب بكين لأجله مؤخرًا.
"برطمان مربى"
أغرب سبب بكت لأجله "نشوى الوكيل" مؤخرًا هو "برطمان مربى" لم تتمكن من فتحه وحيدة وتحكى "كنت حامل وجوزى بيسافر ويجى كل أسبوع، وكنت جايبة بطرمان مربى، وأنا لازم حد يفتحهولى ومحدش كان معايا؛ كنت نفسى آكل مربى جدا فقعدت أعيط واتصلت بيه فى التليفون الفجر افتكر حاجة حصلت وانا اتشحتف مش قادرة أتكلم قال لى لو مقولتيش مالك هجيلك دلوقتى قلت له مش عارفة افتح بطرمان المربي، وطبعًا مش هقدر أحكى عن رد فعله".
أما "دعاء محمد" فبكت هى الأخرى بسبب "برطمان" ولكنه خاص بالصلصة هذه المرة وتقول "أنا فى أول جوازى كنت بطبخ لجوزى وماكنتش عارفة أفتح برطمان الصلصة رحت معيطة".
"جوزى غلبنى فى الكوتشينة"
أما "نهى" فرصدت قائمة طويلة بأغرب الأسباب التى دفعتها للبكاء "مرة عيطت علشان جوزى غلبنى فى الكوتشينة، ومرة تانية عيطت علشان المحشى مش راضى يستوي، ومره عيطت علشان رمشين من عينى وقعوا مرة واحدة واقول لماما كده شعر رموشى هيخلص وهى تطبطب عليا وتقولى إن شاء الله هيطلعوا تانى".
"مش عارفة أظبط الطرحة"
وتحدثت "ريهام أحمد" عن أغرب 3 أسباب دفعتها للبكاء "ما كنتش عارفة اظبط الطرحة قعدت أعيط، القطر كان زحمة وكان فى ناس بيتخانقوا وصوتهم عالى، نزلت اتفتحت فى العياط، ومرة كان القطر زحمة بردو ومعرفتش أركب قعدت أعيط".
كذلك "ريهام حامد" التى قالت "عیطت مرة علشان الطرحه مش عارفه الفها كويس، وعیطت مرة علشان الآيلاينر مش عارفة أرسمه کویس ومسحته کذا مرة وانفجرت فی العیاط ومارحتش الکلیة، وعیطت مرة علشان لقیت النسکافیه خلص وأنا عایزة اشرب نسکافیه".
"اللبس ضيق عليا ومالقتش حزام الفستان"
الدولاب الذى دائمًا ما يكون مصدر بهجة وسعادة النساء يمكن أيضًا أن يكون سبب بكائهن فقالت "آية عبدالهادى": "عيطت امبارح لأنى حامل فى الثامن وكل ما ألبس طقم ألاقيه ضيق وبيتحشر فيا ويخنقنى.. قعدت أعيط وفى الآخر لبست الطقم الروتينى اللى بلبسه دايمًا".
وقالت "منى جمال": "عيطت عشان اشتريت فستان جديد ورحت البيت ما لقيتش الحزام بتاعه، فقعدت أعيط".
"الأمومة"
أما تجارب الأمهات مع البكاء لأغرب الأسباب فقالت عنها "شيرين": "بضرب بنتى وأحكى لبابها ضربتها ليه فأعيط أنا"، وقالت "هدير": "عيطت أول امبارح عشان ابنى كان بيبص لى قبل ما ينام وأنا ماكنتش مركزة معاه، فضلت أعيط لحد 3 الصبح وجوزى يهدى فيا، وحضنت ابنى وفضلت أبوسه وقلت له أول ما تصحى هفضل باصة لك مش هعمل أى حاجة تانية".