دورى الدرجة الثالثة بمنطقة الجيزة منجم ذهب بمعنى الكلمة، لعيبة تصلح للعب بالممتاز وبمقابل مادى بسيط جدا، منطقة الجيزة والدرجة دى تستحق المتابعة ، ممكن أقولكم على أكتر من اسم يستحقون الكثير.
كنت متابعا جيدا لمعظم المباريات لـ13 فريقا فى 26 أسبوعا، أثمر عن صعود الشرقية والإعلاميين لدورة الترقى مع الاتصالات والسكة، وهبط لدورى الدرجة الرابعة السكر وبشتيل بعد لقاء الصيد فى الصيد، كان يكفى بشتيل التعادل بس خسروا ونزلوا للدرجة الرابعة والصيد استمر فى الدرجة الثالثة بأعجوبة .
هيصعد فريق من الأربع فرق للممتاز ب منهم ثلاث فرق لعبوا ممتاز الشرقية والسكة والاتصالات.
_الشرقية للدخان.. كان ضامن الصعود من قبل ما يلعب، بفضل إمكانيات لاعبيه، والنادى يمتلك تيم قوى جدا وقوام فريق بدكة ممتاز جدا وجهاز واستقرار 62 نقطة بدون هزيمة فريق بيغير طريقة لعبه وبيدور لعيبة والأداء والمكسب ثابت.
_الإعلاميين.. فريق يمتلك إمكانيات أيضا كبيرة وتيم محترم جدا وكورة حلوة، كان ليهم هدف ولعبوا عليه مع بعض التدعيمات هيكونوا أفضل.
_نادى حلوان العام بداية الموسم أثرت كثيرا عليه، لكن بفضل امتلاكهم فريق كويس ممكن يبنوا عليه فى السنة اللى جايه لفريق أقوى.
_أبو النمرس.. مفاجأة متوقعة تيم كويس جدا أول سنة لهم، عندهم لعيبة عالية الجودة، لو عندهم إمكانيات مادية أكثر من كدا هيصعدوا ممتاز ب بدأوا الموسم كويس جدا بس كان لازم يدعموا الفريق بين الدورين.
_جولدى.. إمكانيات النادى كبيرة ولعيبة كلها لعبت ممتاز ب، وفريق تقيل جدا كلعيبة وجهاز كمان بس فيه حاجة غريبة خسر كتير بسوء حظ وأخطاء كتير، فريق جولدى يستحق مكان أفضل.
_المعادى.. فريق مجتهد جدا وعندهم لعيبة كويسة بس عندهم نقص كتير لازم الفريق يكمل فى كل المراكز عشان يقدر يكمل..
_التصنيع اللى اتفرج على هذا الفريق وعارف اللاعيبين والأسماء اللى موجودة ما ينفعش يصدق أنهم ماصعدوش فريق عنده أسماء كبيرة جدا وتيم بيلعب كورة حلوة جدا.
_العياط.. مفاجأة من مفاجآت البطولة أول موسم بعد الصعود عندهم تاريخ كبير ونادى عريق نتائج كويسة جدا وبداية كويسة لو بين الدورين دعموا وماباعوش لعيبة كان معاهم فرصة الصعود بس على العموم فريق بيلعب بحماس وروح كبيرة.
_جينيس.. كل اللى تابع البطولة من أولها يقول جينيس هيصعد، مجموعة من النجوم واللعيبة ونظام وسيستم كويس جدا وروح بين اللعيبة كويسة جدا بس نتائج عجيبة جدا للفريق، تيم جينيس مكانه ممتاز ب.
_الصيد.. فريق قعد فى آخر مباراة ودى حاجة غريبة على تيم عنده كل الإمكانيات من لعيبة وإدارة وكل حاجة، كان لازم الصيد ينافس فوق، الفريق عمل إعجاز إنه رجع من بعيد وقعد فى الدورى.
_الصف.. فريق مجتهد جدا، وأنه بأقل إمكانيات بيقعد ولعيبة رجالة وبيستغلوا ملعبهم نموذج صعب تخرج من هناك بنقطة، مصدر قوتهم حماسهم وجمهورهم بس دول مش كفاية للمنافسة.
_بشتيل.. بشتيل عمل دور تانى هو الأقل لهم، فريق قوى جدا وعنيف جدا على ملعبه، والدور الأول كان كويس لكن الدور التانى الفريق نزل كتير بشتيل نزل عشان بدأ يفرط فى النقط على أرضه.
_السكر.. حاجة تزعل لما تشوف فريق عريق جدا فى الرابعة، فريق عنده إمكانيات كبيرة جدا، بس فريق السكر بدأ الموسم وحش والأغرب استمرار الفريق على نفس النسق لآخر الموسم.
وأخيرا ماهى توقعاتكم مين يصعد للممتاز ب (السكة والاتصالات والشرقية والإعلاميين )؟