الإعلامى باسم يوسف لفريق "البرنامج": أنتوا كلكم اشتغلتوا وأنا اللى قعدت فى البيت

نشر الإعلامى باسم يوسف على صفحته الخاصة على الفيس بوك صور تجمعه مع فريق إعداد برنامج"البرنامج"، وكتب تعليقا عليها "دى كانت آخر مرة نتجمع فيها مع بعض، بعدها بشوية انا سبت البلد. الصور دى بانشرها مش عشان افتكر البرنامج، أنا بنشرها عشان أنا فخور جدا بكل الناس اللى فى الصورة دى اللى دلوقتى كل واحد فيهم يا إما عنده البرنامج بتاعه أو له دور مؤثر فى برامج تانية، خالد وشادى عاملين شغل مافيش أحلى من كده فى ساترداى نايت بالعربى.
أضاف باسم على صفحته على الفيس بوك:"ما كانش حد تانى يقدر يعمل الشغل ده و كونهم أنهم يبقوا جزء من كتابة تاريخ التليفزيون العربى فى حاجة تاريخية زى البرنامج دى فده شئ عظيم، وطبعا وراهم فريق هايل كان نفسى يبقى ليا الحظ إنى اشتغل معاهم، أيمن حيبتدى برنامجه الجديد قريب، أيمن من مهندس عبقرى لكاتب عبقرى لأكيد مقدم برامج عبقرى فأنا مش خايف عليه.
وأضاف أيضا هند أحسن منتج فنى فى مصر، من غيرها ما كنتش حقدر أجمع الفريق العظيم ده ولا أديره. شغاله فى كذا برنامج من خلف الكواليس و شغلها باين و لسه حيبان، ريتا line producer مافيش زيها و جندى مجهول فى برامج كتيرة. استحملت سخافة الشغل و كانت بتقعد على المونتاج لما الكل كان بيروح، خليفة مخرجى المفضل والوحيد بيخرج كذا حاجة و مازال بيرسم بعدسته أعمال فنية ف يكل حاجة بيعملها ، ووسام بيكتب فى خمسين حاجة ما بين إعلانات و برامج، مبسوط إنك انضميت معانا فى الآخر و زعلان إن ده ما طولش.

أنديل مش باين فى الصورة لأنه متمرد و ديماجوجى وسفسطائى فبيحتقرنا ومش بيخرج معانا، بس بحبه برضة.
وقال باسم:"الصورة للأسف مافيش فيها الفريق العظيم اللى كان بيعد وبيدور ويبحث فى الألف ساعة يوميا. شغلهم باين فى برامج كتير، من ساترداى لايف، لأبلة فاهيتا لميصحش كده لحاجات على النت زى فينيت و جلوكال وحاجات كتيرة تانية. أنا مبسوط إنى كان ليا الحظ إنى أشتغل معاكم كلكم، وصحيح البرنامج وقف لكن التجربة دى طلع منها المواهب العظيمة دي، منهم اللى بيقولوا انهم اتعلموا من البرنامج وأنا مش موافق على كده، البرنامج كان مجرد محطة اتقابلنا فيها واللى حصل بعد كده استحقاق طبيعى لموهبتكم. هل حنتجمع تانى مع بعض و لا لأ ؟ الله أعلم. حتفضل بيننا الذكريات الحلوة و الشغل اللى بيطلع كل يوم منكم فى برامج كتير و بيفكرنا بشغلنا مع بعض.
ووجه باسم فى نهاية البوست كلمة لخليفة :"فاكر لما كنت باقولك: "البرنامج حيجيله يوم و يتمنع و كلكم حتشتغلوا وأنا اللى حاقعد فى البيت؟" شفت؟ كان عندى حق و أنا مش زعلان بالعكس ...الواحد سعيد إنه جاتله فرصه مش متاحة لحد تاني. فى تلات سنين عملنا اللى ناس تانية ماعملتوش فى تلاتين سنة. وأنتم لسه مكملين، و كل سنة وأنت طيبين بمناسبة عيد ميلادى، الأسبوع الجاى.