نيرة الإمام تكتب : شيفت ديليت

شيفت ديليت ع الماضى وابدأ من جديد خلى كل لحظة ف عمرك دفا مش جليد خلى من بكره دايما بالنسبالك عيد دوس على أوجاعك وإجعل منها سلم بيه تعلى فكر إزاى تنسى الألم وتخلى بكره أحلى الحياه مدرسة والألم والوجع أكبر معلم إنت مش عايش عشان تنكسر لازم تقوى وتتعلم لو غلبتك دموعك إجعل منها بحر يغسلك من ذلات الماضى خليها تنزل وإنت ساجد للى خلقك متنزلهاش ع الفاضى إنتبه إنت مش ضعيف وإوعى تقول لنفسك الوقت فات لا قليل الحيلة ولا كفيف وعندك عقل يخليك أقوى المخلوقات المفروض إنك بتعبر عن الإنسانية متخليش رسالتك تملاها الأنانية متأذيش حد مهما شفت من أذية عيش حياتك بقلب سليم واطلب الرحمة من الرحيم وحده قادر يعيد لك حقك ويحقق لك أكتر ما كان بودك متشكيش حالك إلا للى خلقك هو عالم بيك أكتر من نفسك وهو الوحيد اللى هيرحم ذُلك ويجعل لك منه قوة وكرامة مش هيسيب لجرحك أى علامة ما تسيبش اليأس يسيطر على أفكارك خلى التفاؤل والأمل ينقذك من انهيارك قوم خد شاور وإتشيك وإخرج وواجه العالم بكل قوة بروح جديدة وحماس إخلق سعادتك وإهزم أحزانك من جوه متخليش حياتك تقف على غيرك ثق بنفسك وإتكل على ربك عيش بإخلاص وإرضى ضميرك وخلى الكل يعيش على حسك هيخلفه عليك المولى باللى ميخطرش فى بالك وراح تتعجب من عوضه وكرمه وصلاح حالك (ولسوف يعطيك ربك فترضى) فمتعترضش ده كل اللى رضى بحاله فرح أوى ومندمش سامح بقى وأعفى وفوض أمرك لله ده ربك عمره ما إتأخر عن اللى ناداه