بتنطى لسة من السما السابعة
وبترسمى وشك بالنور على السحابات
وبتلعبى السيجة يا عيّلة لوحدك
وبتحجلى بروحك فوق السبع سموات
ميِسك رخام مقطوع من قلبك المشروخ
بتحدّفى دمعك..كل النجوم بتدوخ
يا بت حُسن القمر..جنبك يبان ممسوخ
وانتى اللى حُسنك آية وعلامة م العلامات
يا بت بزيادة كفياكى حجل ونط
عدى اربعين عمرك وانتى ف أول خط
يا بت معقولة ..لساكى ف الأولى؟!
لساكى هربانة للآخرة م الأولى
يلا انزلى لأمك
بتنادى ع السلم
خبى قطوع كُمك
عصايتها بتعلم
وانتى اللى غلطانة
دايما ومسئولة
رجعالها ليه بتبكي
بضفيرة محلولة
والطين على الفستان
وازاى هتغفرلك لعبك مع الصبيان
موتّى كام واحد بسلك شوق عريان
يا كارهة ضى الصبا
ف ملامح الغلمان
انتى اللى قتلاهم والا اللى مقتولة
وامتى هتكونى بطلة حواديتهم
وتخدى دور تاني
غير أمنا الغولة