يا جيشى يا ولادى يا شعبى
بناديكم من شدة تعبى
تقفوا لى واقفة رجالة
ومعاكم الصعب يعَدى
مين يقدر يقرب منى وأنا حاطة إيدكم فى إيديا
يا ولادى ده انتو النينى والنور اللى تشوفه عينيا
مين فيكم يسمح لعدوى يدبح ويقطع فيا
ده لسانكم بيقوللى يا أمى وقلوبكم بتحابى عليا
خافوا عليا يا ولادى، زمن الفتنة مش عادى
هرمى ونيللكم بيغنوا، بأعلى صوتهم يا بلادى
أهل الغدر بلا رحمة، خطفوا أخواتكم وولادى
قتلوا وذبحوا فى الزحمة، الشكل صعب ومش عادى
حابسة دموعى ومش هابكى ولا هافضل انادى ولا هاشكى
أمانة عليكم يا ولادى تهدوا الدنيا عشان ابنى
أدوا الدور اللى عليكوا ، دى مصر أمانة فى رقابيكوا
اقفوا واقفة رجالة وتاريخى قادر يحميكوا
أنا مصر اللى تهز الدنيا وترج العالم حواليها
أنا مصر اللى ابنى فى ثانية ، بروحه ودمه بيفديها
أنا مصر اللى العالم كله ، طول عمره بيبص عليها
أنا مصر اللى المولى حافظها وفى كتابه قال إنه حاميها