سافر وهاجر
وابعد لو كنت قادر
وانسى لو كنت فاكر
انسى كل الذكريات
انسى كل ماضى فات
انسى حتى يوم ميلادك
ولا لمة عيد ميلادك
والكل فرحان بأعيادك
انسى فرحة ابوك وامك
لما نجحت فى سنة دراستك
لما أخدت نجمة فى كراستك
لما كبرت وخط شنبك
وصاحب العمر واقف جنبك
لما روحت توصل اختك
وهيه رايحة كمان مدرستك
لما تسهر مع صحابك
فى ليلة عيد أيام شبابك
ولعب الكرة مع صحابك
انسى كمان جدران البيت
خد منك لما اشتكيت
وكنت حزين لما بكيت
انسى أهلك انسى بلدك
انسى أى ذكرى عندك
انسى حتى كل شارع
مشيت يوم فيه
وكل مكان عديت عليه
وابقى قابلنى لو نسيت
صبر نفسك لو بكيت
بذكرى حلوة ولا غنوة
بس عايزك تعمل حسابك
وأنت بتودع أحبابك
اليوم اللى يعدى عليك
من غير ناس حلوة حواليك
تحبك وتشتريك
لا يمكن يرجع تانى
وأيامك تبقى ما ليها معانى
تقعد تندم وتقول يا ريت
لو الزمان يعود من تانى