لساه حروفك طاقة نور
وصورتك ع جدران الشارع
وحيطان البيت
رغم الموت
عايش فى وجدان الحرافيش
والناس العاشقة لصوتك
بتشوفك
اخر فارس ف ميدان العامية
ولساه حروفك ماده جذور
شجر الصنت مع شجر التوت
لساها فاكرة
ساعات العصرية
كنت هناك بتفوت
وتقعد تحت الضليلة
ترسم ع الأرض حروف
لساه حروفك ونسة بيت
اتزاحموا ع باب الشعر
كام هلفوت
مش عاملين حرمة للموت
اهتز ديوان البيت
لما بنعشك عديت
رغم الموت
شايل هم الصاحين
ف هدمه ولقمة عيش
غلابة الكون هم الصوت
لو ماتوا
الدنيا هتبقى سكوت
لساه حروفك صوره وصوت
صوت لحراجى القط
وصورة لفاطنه ام قنديل