زمان كان فى نوع من الرجال اللى بيخبى فلوسه من مراته خوفا من أنها تطلب منه يزود مصروف البيت ( على اساس يعنى أنها حتطلع بيهم الاسكندرية مع أصحابها ! ) وكان يصرف اللى مخبيه على مزاجه فى قعدة على القهوة او على ست حلوة و اللى يعاتبه يقوله فلوسى وانا حر فيها وكانت المسكينة تدبر امورها باللى سايبه واهى عيشة وتعدى .
النوع ده من الرجال بحكم الطبيعة تكاثر وتكاثر بشدة كمان واتغيرت الصفات الوراثية بسبب التلوث والإشعاع وظهر منهم نوع جديد، النوع الجديد ده اول مايشم أن مراته معاها فلوس سواء ورثها او مرتبها، بيبدأ يعاملها كويس ويبدأ يختبرها ويجهز الخطة . تبدأ الخطة مثلا وهم فى محل او بنزينة وهو بيحاسب يجى عند الفكة ويقولها مش معاه فكة، طبعا الزوجة الطيبة على طول تطلع الفكة اللى معاها وده شيء طبيعى، اللى مش طبيعى انه بيكون معاه فكة، بس هو بيجربها الاول . نجح الاختبار الاول ويدخل بقى على الاختبار التانى، يبدأ الزوج يقول لزوجته أنها تجيب معاها مجموعة طلبات ولما ترجع طبعا مايحاسبهاش و المسكينة تتحرج تطلب منه و شوية شوية يحمل عليها الطلبات دى دايما . و الجزء الأهم من الخطة انة بعد ما يضمن أنها اتحملت جزء محترم من مصروف البيت يبدأ يهرب من اى واجب عليه علشان يجبرها تدفع هى، و بعد مرور السنين تلاقى الزوجة نفسها خلصت كل ورثها او مرتبها و تلاقى زوجها بيصرف فلوسه على متعته الشخصية و شياكته وطالع نازل مش متحمل اى مسؤلية . هى اللى شايلة مسؤوليات الاولاد ومصاريفهم كاملة حتى هم لما يطلبوا بيطلبوا منها هى، ويزيد على كدة معاملة سيئة جدا من الزوج الانانى لأنه خلاص ضمنها وضمن أنها مش حتتراجع ولا هو كمان حيتراجع عن انانيته و تخليه عن مسؤولياته و يزيد و يغطى انة متخيل انه الراجل، من حقة يأمر و ينهى و كلمتة تكون مسموعة وانة يعمل اللى هو عاوزة ويعرف ستات ويمشى معاهم و يكلمهم فى الموبايل بدون اى احترام لمشاعر الزوجة و يتجوز تانى وتالت براحتة ماهو بفلوسه . والمأساة الأكبر انه بيستغل طموحها فى أنها تحسن من أحوال المعيشة يعنى مثلا لو عاوزة تجيب شقة أفضل او عربية ياخد منها لانة مش معاه اللى يكفى وتفاجأ الزوجة اللى إتمنته على مالها انة كتب الشقة او العربية او المحل باسمة هو و لو اعترضت بتتشتم و تتهزأ و يتقالها انه راجل مايقبلش يقعد فى ملك باسم مراتة او حتى مناصفة. اى رجولة دى اللى ماتسمحش انه يعيش فى شقة باسمها مناصفة و تسمحله انة ياخد فلوسها . اى رجولة تسمح انة يكون معاه فلوس و يخلى مراتة هى اللى تتحمل مصروف البيت . اى رجولة انه يستغل طموح مراتة اللى قبلت تعيش فى مستوى اقل من المستوى اللى أهلها ربوها علية علشان حبته ولما ربنا كرمة حبت تعلى مستواها يقوم يستغلها . اى رجولة اللى تخلى أولادك يطلبوا من مامتهم و مايطلبوش منك انت . اى رجولة اللى تخليك بعد كل اللى الزوجة بتعمله علشانك تخونها وتجرح احاسيسها .
الراجل الحقيقى هو اللى يصرف على بيتة ويتحمل مسؤلياتة كاملة والزوجة الوفية هى اللى تساعد زوجها لو احتاج من غير ما تجرح أحاسيسه واكيد حتبقى منتظرة منه حسن المعاملة.