يشوفك يفرد دراعينه يحضنك بلهفة العطشان
زى المشتاق للغطا فى ليالى تلج طوبة سقعان
زى ام ملهوفة تعمل رضعة وليد مستنية الألبان
زى طفل فى اللفة يعرف امه بس لو كان جعان
مع انه كان معاك من ساعات فات عليهم آذان
ايد حضناك بشدة والتانية سكينة سنها السنان
الغل حقده وحسد بيغلى جواه زى مية السخان
من ودنه للتانية ابتسامه مصنوعة من خرزان
لونها لمونة نبتت فى مستنقع نتن بره الزمان
يدوب يتلفت لسانه ينهش بكرامتك كأنه تعيان
لا ينفع صاحب ولا ينفع مع نافخ الكير سندان
تاه الصاحب الصح بقى ذكرى مالهاش عنوان
لف لسانه فى سفالة دابت ومنه هديه للشيطان
صدق النية بقى زى السم فى صيدلية الحرمان
عايش تايه عن كل طريق صح لصدق الإيمان
إلا ما رحم ربى قلة قليلة بواقى بطهارة اللسان
بقوا فاكهة غالية منا مكتوب عليها أنا الانسان
ياريت نأسس أولادنا بالدين الصح نعلى البنيان
نعلى بأولادنا بسلوك طه وهدايته فى كل ميدان
وتحيا بهم مصر بمجاديف الأدب دايما فى أمان