سألت كتير عن السعادة، يا ترى إيه سبب السعادة ؟! هل هى الفلوس ولا الصحة ولا إيه بالضبط ؟! قررت اعمل رحلة بحث عن السعادة فى وشوش الناس .
بصيت للغنى، اكيد هو سعيد لأن كل حاجة عندة بس لقيتة مش سعيد . بصيت للصحيح المعافى اكيد سعيد يقدر يعمل كل حاجة بس لقيتة مش سعيد . بصيت للإيمان برضة لقيت أن الإيمان بيعمل سكينة وراحة بال بس مش سعادة . كل دى نعم ربنا انعمها علينا، بس مش علشان نكون سعداء، ربنا ادانا النعم دى علشان نستخدمها و نستفيد منها ونعرف طريق السعادة .
فشلت أعرف طريق السعادة من وشوش الناس، قررت أبحث عنها فى دولاب الذكريات الخاصة بى . فتحت دولاب ذكرياتى وافتكرت اكتر ايام كنت فيها سعيدة، لقيت ايام ما كنت منتظرة دخولى لأول يوم فى الكلية اللى اخترتها بعد ماتعبت واجتهدت فى الثانوية العامة .
افتكرت سعادتى وانا منتظرة ادخل بيتى الجديد مع الانسان اللى اخترتة و قررت أبدا معاة مشوارى ومستقبلى . يعنى ممكن تكون السعادة فى الأنتظار ؟!
الانتظار يعنى الأمل، الأمل فى بكرة وعلشان يبقى عندى امل فى بكرة يبقى لازم يكون عندى طموح وحلم .
فعلا لما كان عندنا طموح وأحلام وامل فى بكرة كنا سعداء، كما بننام على امل تحقيق حلمنا، بس لما كبرنا وبطلنا نحلم وبطلنا نستنى بكرة، هربت السعادة من عيونا .
فرق كبير جدا بين انك تنام مستنى بكرة علشان تحقق حلمك، و انك تنام علشان اليوم يخلص وبكرة برضة يخلص .
لسة الحياة ادامنا طويلة ولسة ممكن نحلم و نستغل نعم ربنا علينا علشان نحقق أحلامنا، نحلم بأى حلم جميل، وننام على امل أن بكرة جاى علشان نكمل حلمنا .