الفرحة جميلة مافيش كلام، وبتدينا طاقة إيجابية لاستكمال الحياة، لكن يجب أن نفرح بشكل يليق بآدميتنا كمصريين، نفهم فى الأصول، ولا نتجاوز الخطوط الحمراء، وهنا يجب أن أنوه عما يحدث فى الأفراح الشعبية التى تكون داخل وخارج مدن وأحياء المحروسة، تتعزم على فرح شعبى تقول ألف مليون مبروك، وربنا يتمم على خير، تذهب لكى تؤدى الواجب، تجلس على كرسى فراشة تبص حواليك تلاقى ترابيزات مليانة بزجاجات البيرة ده غير الحشيش، وكل شىء مباح، شوية بشوية تبص تلاقى الرقاصة، والعملية احلوت على الآخر، شويتين وتلاقى الفرح الشعبى تحول إلى شرب مخدرات ومعازيم تطلع على المسرح وتتحرش بالرقاصة، وكل شىء مباح للأسف الشديد، وطبعا فى أطفال وسيدات وبنات يشاهدون كل هذه الأفعال من الشبابيك أو البلكونات وشوية شوية تبص تلاقى الرقاصة تستعرض إمكانياتها بشكل خادش للحياء، وتفعل ذلك للحصول على نقطة أكثر من المعازيم اللى مش فى وعيهم أساساً، وطبعا ده كله بتصاريح من القسم التابع له منطقة الفرح، وتنزل قوة من القسم وسلام مربع للحكومة، وسلام مربع لجميع أفراد الشرطة وأضرب 100 طلقة فى الجو للحكومة، والحكومة اللى نازلة تؤدى واجبها يفضلوا فى البوكس محلك سر لأن صاحب الفرح رحب بهم ترحيبا هائلا وتبص تلاقى الحكومة يغادرون الفرح ولا أى اندهاش ومع أنهم يعلمون جيدا أن فى ناس يشربون مخدرات ويسكرون وهذا مخالف للقانون !
فلابد من تنفيذ القانون على الجميع فى مثل هذه الافراح من الغنى إلى الفقير دون محسوبية لأحد لكى يتحقق العدل فى شتى المجالات فى أنحاء مصر المحروسة لكى يعم الخير على بلدنا الحبيبة .