قال المطرب رامى صبرى إننا دائما تحت أمر التليفزيون المصرى الذى يمثل بلدنا اللى احنا دايما تحت أمرها ووراها.
وأضاف خلال لقائه مع الإعلامية ناردين فرج على القناة الأولى المصرية ببرنامج التاسعة: "أنا لما بشتغل على أغنية جديدة بيبقى عندى طاقة إنها تنجح وتكسر الدنيا أول ما بتنزل بسيبها على ربنا وأغنية حياتى مش تمام دى أول أغنية تنجح بسرعة، أنا بدأت أهتم كثيرا برغبات الجمهور وقررت أعمل حاجات الجمهور يحبها ويتابعها وده خلى الأغنية تنتشر على التيك توك وحاجات زى كده.
وتابع: هي عدت 2 مليون في 4 أيام ودلوقتى عدت 4 مليون في أسبوعين الناس دلوقتى عاوزة تسمع حاجات مش عادية واللى هيغنى كلمات عادية مش هينجح، أنا بدور على أى حاجة مختلفة وحاجة جديدة علشان الناس بتدور على حاجات غريبة، أنا بشوف أن الحب قصص كثيرة الحب فيه مشاكل وعذاب ووحشة، وتفاصيل كثيرة هي كمان بتتكلم عن الحب لأن فيه فقدان ومخاصمة الشوارع وده نوع من الحب.
وأكمل: لما عملت أغنية الراجل كانت أكثر الناس اللى بتطلبها منى في الأفراح الستات وخصوصا العروسة وكلمتنى جرائد من أمريكا على الأغنية دى وقالولى إزاى انت بتهاجم المرأة وطبعا أنا مش قصدى أهاجم المرأة.