استعرض الإعلامي عمرو أديب، خلال برنامج الحكاية الذي يذاع على قناة mbc مصر، الوضع الحالي للشوارع بمختلف أنحاء الجمهورية بعد تطبيق وزارة الداخلية قرار حظر التجوال، ومدى التزام المواطنين بالقرار من أجل الوقاية ومنع انتشار فيروس كورونا المستجد، والذي عانت منه عشرات الدول في العالم، حيث تم رصد الوضع الأمني بشارع عباس العقاد بمدينة نصر وعدد من شوارع وسط القاهرة، بالإضافة إلى الشوارع المزحمة في الأيام العادية بمحافظات الجيزة والدقهلية وبني سويف.
وقال الإعلامي عمرو أديب، تعليقا على وضع الشوارع حاليا: "اللى شايفينه دلوقتي ده خيال علمي، ووزارة الداخلية تطبقه بشكل راقي ومحترم، الشرطة مش هترحم حد مش هيلتزم بالقرار ده لأنه في مصلحة الجميع، واللي بيحصل ده حاجة محترمة والمعنى الحقيقي للالتزام، وأن هذا الحسم والحزم اللي طلبناه قبل كدة، هو ده الانصياع المحترم من أبناء الشعب المصري، ودي علامات واضحة جدا زي ما اتكلمنا قبل كدة، وده مجهود جبار أنك تقدر تأمن كل ده".
وأضاف عمرو أديب: "أنك تقدر تظبط مفاصل البلد وأن الكل يقعد وحاجة هايلة وشئ عظيم جدا، ودي منظومة كاملة، قدرت توصلنا للي وصلنا له دلوقتي، وده كله لا يأتي إلا بمجهود كبير والتزام الناس، لأن الناس وصلت قدر من الوعي وفهمت أن ده لمصلحتها، ده لا لمصلحة حكومة ولا لمصلحة حد، ده لمصلحة المواطن المصري وحرصا عليه حياته الغالية".