علق الإعلامي عمرو أديب، على إقامة عدد كبير من الناس حفلات أفراح وخطوبة في ظل انتشار فيروس كورونا، وقال: "ده مش وقته تعمل فرح وخطوبة اليومين دول صدقوني إحنا مش ضامنين اليومين الجايين دول فيهم إيه، هنحتاج كل قرش في الفترة اللي جاية، الدولار قيمته بدأت تزيد مقارنة بالجنيه المصري والاقتصاد العالمي كله أصبح مستقبله مجهول ومحدش عارف الموضوع هيرسى على إيه".
وأضاف عمرو أديب، خلال برنامج "الحكاية" الذي يذاع على قناة mbc مصر: "في دراسات بتقول أن الدفعة اللي هتتخرج في 2020 دي مش هتشتغل أساسا وده في العالم كله مش في مصر بس، في دفعتين تلاتة كدة محدش يعرف مصيرهم إيه في الشغل، لأن عدد كبير من المؤسسات الخاصة هتقفل بسبب الأزمة الاقتصادية والحكومات هتبقى صعب تشغل الأعداد الكبيرة اللي هتتخرج، وعلى فكرة الأداء في موضوع الكمامات جيد حتى الآن لأن الناس اتقرصت".
وأضاف عمرو أديب: "الفتح أصعب من الإغلاق، الناس اللي بتتكلم في فتح المطاعم والكافيهات، الموضوع صعب ومحتاج عدد كبير من المتطوعين وأجهزة قياس درجات الحرارة، الناس بتقول شوفوا الناس في أمريكا بتنزل وبتتظاهر في وسط الأزمة ومش لابسين كمامات، وأنا شخصيا معنديش تفسير طبي، لكن الشىء الوحيد اللي أقدر أقوله أنك يجب أن ترتدي الكمامة وتغسل يديك طوال الوقت".