قالت منار خالد، شقيقة محمد خالد الشاب المتوفى بعد أيام من كتابة منشور عن الموت، إن شقيقها كان عمره 19 سنة فى المرحلة الثانوية، مشيرة إلى أنه لم يشكُ من شيء، مضيفة: "مكنش فيه أى حاجة خالص، كنا نقوله كاتب ليه كدة، بيقول مش كاتب حاجة غلط".
وأضافت، خلال مداخلة هاتفية لبرنامج "التاسعة"، عبر القناة الأولى المصرية، مع الإعلامى وائل الإبراشى: "كنا بنقوله بتوجع قلبنا ليه، مكنش بيقول بيعانى من حاجة، كان بيضحك كتير أوى، ونقوله بتضحك على إيه، مكنش بيرد علينا أو يقول مش عاوزنّى أبقى فرحان". وتابعت شقيقة الشاب المتوفى: "مكنش بيصلى، وآخر 3 أيام بدأ يصلى وبدأ يقرأ قرآن".
من جانبها قالت والدة الشاب المتوفى باكية: "كنا بنقوله ليه بتكتب الحاجات دى، يقولى كل ده مكتوب علينا، وعادى يا ماما مفيش حاجة"، مؤكدة أن ابنها كان يعيش حالة يأس، وكان يشعر بالوحدة وحزن كبير، وكان حسّاسا جداً.
وفى سياق متصل قال محمود شقيق الشاب المتوفى: "محمد قبل ما يتوفى قال إنه هيتوفى، وكان حلم إنه هيموت"، مردفاً: "كان بيعمل عيد ميلاد صاحبه حسن، وقالهم هنعمل عيد ميلاد حسن يوم الجمعة لكن أنا مش هاجى، وتوفى يوم الخميس قبل فجر الجمعة، وذلك فى حادث فى طريقه إلى والدته التى كانت مريضة".
