أكدت الفنانة نهال عنبر، أن هناك بعض الصديقات المقربات من الشخص، يشعرون بالغيرة تجاهه فى الكثير من الأحيان، وخاصة فى لحظات الفرح، وقالت: "في بنت كانت قاعدة مع صحبتها يوم الفرح بتاعها وكانت فرحانة ليها وهزار وضحك وكل حاجة كويسة، فجأة الحذاء بتاع العروسة اختفى، ولما فرغوا الكاميرات اكتشفوا أن صحبتها الأنتيم أخدت الحذاء وألقت به في القمامة.
وأضافت نهال عنبر، خلال برنامج "راجل و2 ستات" الذى يذاع على قناة "ON E": "هي كان بياين عليها أنها بتغير، لكن لأنها صحبتها المقربة والأنتيم مشافتش ده نهائي، وهي بتغير لأنها شايفة أنها أحسن منها في حاجات، يعني مثلا ممكن تكون هي كانت عاوزة تتجوز وصحبتها سبقتها فحاجة زي دي ولدت جواها نوع من الحقد والغل، وأنا حصل معايا حاجات زي دي، بس حطيت حدود وسدود في علاقاتي بالنوعية دي من الناس".
وقالت: "أقولكوا على نصيحة، أسرارك تبقى ليكي، متحكيش لحد تفاصيل حياتك، ممكن الحاجات البسيطة تتقال زي خرجت انهاردة عملت حاجة أو روحت مكان، غير كدة من الأسرار مينفعش تتقال لأن حقيقي مفيش حاجة مضمونة".