أكدت سلمى الشيمى، فتاة "فوتوسيشن سقارة"، أنها دخلت مجال الأزياء وكان مثلها الأعلى الفنانة سعاد حسنى، وبعد أن أتمت مرحلة الثانوية، استكملت مشوار عملها فى هذا المجال، وعن جلسة التصوير، وقالت: "أنا مصدومة، قطعت تذكرة زى أى حد، ودفعت فلوس تصريح، ودفعت لشخص مش مسؤول فى المكان، هو طلب منى 1500 جنيه وقال لى هيعدينى، وفى أماكن تانية بنصور فيها مبيكونش فيها ورق، ومكنش عندى فكرة أنى لازم أخد ورقة مختومة بالتصريح".
وأضافت خلال لقائها مع الإعلامى شريف عامر ببرنامج "يحدث فى مصر"، المذاع على قناة mbc مصر: "أنا مكنتش بصور في مكان مغلق، وحواليا ناس كتير، ولو بعمل حاجة غلط مش هعملها قصاد الناس، والموضوع انتهى بكفالة 500 جنيه، والقضية مازالت شغالة، وأنا عارفة عقوبة ده، لكن أنا دفعت فلوس لشخص أعتقد أنه مسؤول".
وقالت: "من وقت لآخر بعمل فوتوسيشن، ولما نزلت صور الفوتوسيشن ده فوجئت من رد الفعل الجميل من دول عربية وأجنبية، والسيشن ده مكنش لصالح حد، أنا زى أى حد شوفت صور وحبيت اعملها بس بطريقتى، واتصدمت لما لاقيت نسب الشير بتزيد بسرعة".