كشف الفنان محمد ثروت عن تفاصيل دوره فى مسلسل بين السما والأرض، قائلاً: "ماندو اللى رشحنى لتمثيل الدور ده.. المخرج الشاطر هو اللى طلع فيا الحاجات دى.. ولو حد طلب منى من سنتين دور واحد مجنون فى الأسانسير مكنتش هعرف أعمله.. ويعتبر أول مخرج يعمل كده معايا ويطلع فيا الشخصية الدرامية.. وقريت الرواية لنجيب محفوظ كويس وتطبعت على الشخصية كويس جدا".
وأضاف، خلال حواره مع الإعلامى يوسف الحسينى عبر برنامجه التاسعة المذاع على قناة الأولى المصرية:"الفنان الكبير أحمد بدير جيد جدا وفى التراجيدى جد جدا ومتمكن جدا ويخليك تعيط وممثل عبقرى جدا.. "رشش فشاش" دى شكلت ثقافة جيل بحالة.. وعنده ثبات انفعالى.. ودمه خفيف".
وتابع: "لو المشاهد مؤثرة بتخلى الممثل ينفعل فيها.. وكنت عايش فعلا لحظات حقيقية بالمشاهد.. كنت بشيل جمل بضحك ونحط مكانها جمل تبقى درامية أكثر.. وبحب الكوميدى على طول ولو حد عنده ضغوط كبيرة اتفرج عليها بيفك.. وكنت برفض الأدوار الدرامية.. وعاوز الأدوار الكوميدية، ولكن لما أتعرض عليا دور درامى وافقت لأن الممثل بيعمل كل حاجة.. والنقلة دى بتثبت للناس اللى بيقولوا أننى مش بعمل أدوار درامية".
وعن مشهده فى فيلم كلمنى شكرا: "أول مشهد ليا وكنت من غير شنب.. وكنت بمثل قدام الفنان القديرة شويكار الله يرحمها.. وصبرى فواز أدانى قلمين.. وكل ما يشوفنى يقول لى حقك عليا".
وعن حياته فى الجامعة وتزوجه بمنى: "أتخرجت من كلية تجارة عين شمس بعد 7 سنين، وارتباطى بمنى كان بعد السنة الرابعة من الجامعة بسبب موقف حصل ما بينا.. وبعد سنة ونصف أخدت رقم تليفونها وكلمتها.. وخطبتها وقعت 3 سنين خاطب.. وعمى كان سكر وكان مقتنع بيا.. وكتبنا الكتاب سنتين وبعد كده أتجوزنا وجبنا سليم ولينا 13 سنة مع بعض، وفيه لحظات حلوة ووحشة عشناها مع بعض، واشتغلت أمين مخازن وفى سايبر، وفتحت عربية كبدة وسجق جنب قهوة.. وعرفونى حاجات كتير وشوفت أشخاص كتير وأتعرض عليا مواقف مضحكة كتير.. وده بيدى الممثل ذاكرة انفعالية حلوة".