عمرو خليل يصفق للأولى على الثانوية العامة شعبة أدبى على الهواء.. اعرف السبب

صفق الإعلامى عمرو خليل للطالبة فريدة مؤمن، الأولى على الثانوية العامة الشعبة الأدبي، قائلا: لو لم أصفق لك على أنك الأولى على الثانوية العامة هصفق لك لأن فكرك مرتب ومعلوماتك حاضرة والناس مستمتعة وهى بتسمعلك ولغتك جميلة وسهلة ولسانك فصيح مش زى الناس اللى مخها مشتت.

وقالت فريدة مؤمن المطرى الأولى على الثانوية العامة الشعبة الأدبي من الإسكندرية: أسرتى كانت في قمة السعادة لأن ده كان هدف للأسرة كلها وأنا بحمد ربنا علشان ده توفيق كبير أنا كنت متفوقة لكن ما كنتش من الأوائل ومش دحيحة، لكن بقى في تنظيم للوقت على قد ما ـقدر وكنت دايما بحاول ما أقفش عند سقف معين من الطموحات.

وأضاف خلال مداخلة هاتفية ببرنامج من مصر مع الإعلامى عمرو خليل: مصادر المعلومات السنة دى كانت كثيرة جدا ومليئة بالمعلومات وأتى بثماره في الامتحان، والسنة كانت أصعب كثير من السنوات اللى قبل كده. وتابعت: تأقلمت من أول السنة إنى مش حريصة على الحفظ كنت بتطلع على المعلومات وأفهمها مش بهدف الحفظ، كنت بربط الأحداث ببعض، ولا أنصح أحدا بحفظ المعلومات بل فهمها وأن تكون المعلومة حاضرة في ذهنه، وشايفة أنه مش سباق درجات، السنة دى كانت صعبة جدا والصحة النفسية أهم حاجة على مدار السنة وكل اللى هيحصلك هو الخير، ولابد أن تكون مؤمن أن اللى ربنا كاتبهولك هو الخير وربنا شايلك الأفضل حتى لو حصل عكس ما كنت تتوقعه، وقالت "لم أفكر حتى الآن في الدراسة المستقبلية".