علقت الفنانة ليزا، على غيابها لمدة 38عاما عن الساحة الفنية، منذ عرض مسلسل هند والدكتور نعمان، والذي شاركت فيه بدور الطفلة هند، وقالت: "أنا شلت الضفاير والقُصة، أنا موجودة متقلقوش، أنا سبت مصر عام 1989، ومن الوقت ده وأنا عايشة في كاليفورنيا في الولايات المتحدة الأمريكية".
وأضافت خلال مداخلة مع الإعلامي رامي رضوان ببرنامج "مساء DMC" الذي يذاع على قناة "DMC": "مصر وحشتني جدا، وناسها وحشوني، والطعمية والفول والبط والبحر الأحمر، كل حاجة وحشتني، أنا أتجوزت وخلفت وعندي توأم، هما مش أطفال دلوقتي هما أطول مني دلوقتي، أنا خلفت وربيت".
وقالت: "أنا أول ما جيت الولايات المتحدة كان عندي 12سنة، وجيت على المدرسة على طول، وأتجوزت بدري سنة 1997، كنت مقررة أرجع مصر بس كنت خلفت الأولاد، فمفكرتش في نفسي تاني، كل تفكيري كان فيهم".
وتابعت: "مش مصدقة نفسي إن الناس لسة فاكراني، أنا مش بتفرج على التلفزيون هناك كتير، أشكركم جدا على استضافتي في برنامجكم".