طرح برنامج "راجل و2 ستات" المذاع عبر قناة ON، مشكلة زوجة يخونها زوجها بعد شهر من الزواج، وقالت الإعلامية شريهان أبو الحسن: "مشكلة من العيار الثقيل، واحدة متزوجة من 4 سنوات واكتشفت إن زوجها بيخونها بعد شهر من الزواج، وقال في فترة الخطوبة إنها ساعة شيطان، وأنكر إنه بيكلمها لدلوقتي، رغم إن البنت التانية دخلت وكلمت مراته، وهو لما لاحظ بدأ يمسح الرسائل، وبتسأل: أنا مش مقصرة معاه وهل فيه أمل إنه يتغير أو لأ".
وتابعت الإعلامية شريهان أبو الحسن: "أيوه يا حبيبتي طول ما إحنا عايشين فيه أمل، وطول ما أنت عندك رغبة في تحسين علاقتك به وتتكلمي معاه فيه أمل، وأنا هدعوكي لحاجة إنك تبطلي تدعبسي، لأن الدعبسة دمها تقيل وموترة وسخيفة، ودى أول دعوة ليكي، وأرجوكي بطلي وكل ما تيجي تعملي كده قاومي، لأن اللي بيدور بيلاقي".
وتابعت: "اخلقي جوه نفسك أحاسيس بإنك كفاية، وإنك واثقة في حالك ونفسك، لأن ده الحافز والمحفز إن حياتك تبقى أحسن وأفضل، وأنا لا أبرر ليه يعمل الحاجات دى ولكن إحنا عندنا بيت عايزين نحافظ عليه علشان تكونى سعيدة انت وجوزك.. حاولي واستمري وخلي عندك أمل ولو جوزك عنده مشكلة هتتحل".
في نفس السياق، قالت الفنانة نهال عنبر: "خلي المشاركة معاه كتير، خارجين مع بعض أصحابكم مع بعض ولكن من غير كبسة نفس".