علاقة حب كبيرة جمعت الفنان عمرو سمير بوالدته الإعلامية ماجدة عاصم التى رحلت عن عالمنا مساء أمس بعد صراع مع السرطان وبعد مرور 5 سنوات على وفاة نجلها.
على الرغم من أن ماجدة عاصم معروفة بأنها كانت إعلامية كبيرة في التليفزيون المصري، إلا أن هناك لقاء نادر جمعها بابنها عمرو سمير خلال تقديمه أحد برامجه، حيث استضاف والدته في حلقة للاحتفال بعيد الأم، وقال في بداية الحوار: "عمرى ما اتخيلت إن يعدى السنين وأنا اللى استضيفها فى البرنامج، فريق الإعداد فاجأنى وقالى إنه عايز أمى تكون هى الضيفة فى الأول مكنتش عايز أنتم شايفين أد أي أنا متوتر بس بعد كدا قولت دي أقل حاجة أكرم فيها الست دي على كل حاجة عملتها عشاني في حياتها".
بينما قالت والدته: "أحب أقول في البداية كل سنة وكل أم في الدنيا بخير وبصحة وسلامة، طول عمري أنا اللي بسأل وأول مرة أطلع ضيفة، ويوم ما أطلع يبقى مع ابني، فأنا كمان متوترة بحاول أتخلي عن الموقف".
وعندما سألها عمرو سمير عن مفهوم الأمومة، أوضحت ماجدة عاصم: "الأمومة هي الحنية والعطاء والإحساس بالابن أو الابنة، ولما كنت أكلم أمي أقول بس ألو في التليفون كانت بتقولي مالك ي حبيبتي تحس بيا، الأم حاجة كبيرة أوي، والإنسان بيترمي في حضن أمه أول حاجة ولما يفتقدها هيعرف إن حضنها بيتعوضش".
كما أشارت إلى أنها اتبعت مع أولادها أسلوب مزيج من الحنية والحزم، قائلة: "كنت صاحبتكم جدا انت فاكر، كنتوا بتحكيلي كل حاجة ودا مهم جدا عشان تعرف اللي بيحصل من وراها عشان تعرف تنصحهم، كان بيتحرق دمي من مشاكلكوا واقعد يومين أفكر في الحل، وكنت بعمل نفسي لطيفة، لحد ما أهدى وأفكر هحل ده إزي، مكنتش بعاقب كنت بقول وأنوه عن الغلط علشان ميتكررش تاني، هناك شعره بين الحزم والحنية، ربنا بيخلق الانسان بيها محدش بيقول أنا هبقى حنين، فاكرة إني من نظرة عيني بتعرفوا أنا عايزة أقول ليكوا ايه وتلموا الدنيا اللي بتعملوها".
