قال المخرج يسرى نصر الله: دائما ما تكون لحظات التكريم محرجة، وأنت تشوف نفسك، وأنا مش بعرف اتفرج على أعمالى ما بقدرش، لأن فيه إحساس غريب جدا بالزمن، وأحيانا بيكون إحساس بالاكتئاب، ولست وحدى، ولكن عدد كبير من المخرجين بيحسوا بده، لما تلاقى ان ساعة ونصف هي ملخص عمل وتفكير 3 سنوات.
وأضاف خلال لقائه هاتفية ببرنامج مساء دى إم سى مع الإعلامى رامى رضوان: أضع في أعمالى ملخص تجربتى وخبراتى في العالم، وبالنسبالى القلق في أيام نزول الفيلم لدور العرض دى بتكون أقل حاجة، ولما بعمل فيلم كأنك عريت نفسك كأنك عاوز ترجع لورا تانى، بالتأكيد بشوف أخطاء في أحلامى ومش بتضايق لان ده اللى عرفت اعمله أو ده اللى كان عندى.
وأكمل: عشت تجارب كبيرة وعملت أفلام شاركت في مهرجانات دولية، وسعدت جدا بجائزة الهرم الذهبى، وما أسعدنى أكثر أنه في فيلم أول عرض له كان من 14 سنة، وأنه هيتعرض في المهرجان، وعمرى ما عملت فيلم لوحدى الناس اللى وقفوا معايا واشتغلوا معايا حتى اللى شتمونى كلهم شاركوا في الحدوتة وأرى ان التكريم ليس ليسرى نصر الله ولكن للأفلام لكل العاملين المشاركين في العمل.