بكلماتها الرقيقة وصوتها الهادئ الجذاب وجمال روحها الذى انطبع على ملامح وجهها، اعطت درسا لكل الساخرين والمشمئزين منها وقصفه جبهة الجميع فى فيديو لا يتعدى الثلاث دقائق ولكنه حقق نسبه مشاهدة عاليه على صفحات التواصل الاجتماعى الفيس بوك .
هى اسراء احمد طالبه بالصف الثالث الثانوى ، تعانى من اعاقه بسيطة فى وجهها جعلت البعض يخاف ويسخر منها السبب الذى جعلها تنشر فيديو لتواجه فيه المجتمع وتوجه رسالة للعالم ان القبح فى القلوب وليس فى الوجوه .
انا مش متخلفة عقلية انا مبسوطة بشكلى كدا..، هكذا بدأت اسراء رسالتها فى الفيديو الشهير على الفيس بوك وقالت( انا مش متخلفة عقلية وبحب شكلى كد والحمد لله ، فيه ناس اكتر منى وفيه ناس اقل منى انا عندى عين بشوف بيها ،فيه ناس مش بتشوف خالص، و عندى اربع صوابع فيه ناس معندهاش خالص ، احب اقول للناس الى بتشوفنى وتصوت وتصرخ انتوا الى بتخضونى مش انا الى بخض، حتى لو انتى اتخضيتى من شكلى ليه تخضينى وتخلى الناس كلها تاخد بالها ان فيه واحدة مش طبيعيه ، انا شايفة انى طبيعيه و عندى شوية اختلافات عنك بس الحمد لله بأكل وبشرب وبقرا قران ، والشاب الى اول ميشوفنى يقول لصحبه خطيبتك اهى ، طب منا ممكن ابقى خطبتك انت ممكن ابقى اختك بنتك، والأطفال اللى بتخاف منى لما ببقى موجودة فى المواصلات اوالشارع اهلهم بيعاقبوهم على خوفهم وده بيزعلنى لان الاطفال ملهاش ذنب ، فهموهم براحة انتو كد كد طول الوقت بتخوفوهم من ابو رجل مسلوخة وام اربعه وأربعين فطبيعى انهم يخافوا منى، اما الستات الكبيرة الى تقولى يا عينى يا بنتى ربنا يشفيكى! انا مش حسا ان فيا مرض انا دلوقتى بعمل عمليات عشان ابقى طبيعيه زى الناس الى مشيا فى الشارع مع انى حسا انى طبيعية ،انا عملت عشر عمليات ، لغاية دلوقتى الى عندى بيقولوا عليه فى الطب مرض بس المرض مش تعبنى لدرجة انى اقوم ارفس واعيط واتعب ،هو مرض كشكل من برا بس فيه شوية صعوبة ف الاكل بس الحمد لله باكل كويس ومسمينى فى البيت المفجوعةبزيادة ، اتكلمت عن حجات كتير وحشة بس فيه ناس جميلة كتير بقابلها ف الشارع لما ألاقى حد يساعدنى فى حاجة مش قادرة اشيلها انا راضية عن نفسى فيه ناس جميلة بتشوفنى تقولى انت جميلة وضحكتك حلوة ، انا طبيعيه وراضية عن نفسى وامى ربنا يخليها ليا يارب محبستنيش كان فى ايدها انها تخبينى وتقول انى مش موجودة بس هى علمتنى وربتنى وهى احسن واحدة فى الدنيا ،والناس الى بتسال الى عندك دة حادثة ولا مولودة كدا السؤال مش هيفيدك بحاجة بس انا اتولدت كد وربنا سبحانه وتعالى قال بسم الله الرحمن الرحيم " لا يسخر قوم من قوم عسى ان يكون خيرا منهم " انا مش بقول انى خيرا من حد بس مبحبش حد يتريق على اى حد ،انا هتحمل ده لانى اخدت عليه، احنا بييجى وقت علينا بنقول ليه يارب خلقتنا كد )