"زوجة تطلب الخلع بسبب قطة" خبر احتل حيزًا كبيرًا من اهتمام المصريين فى الفترة الأخيرة، فى حين تكررت هذه المشكلة أكثر من مرة على صفحات المشاكل بمواقع التواصل الاجتماعى، عن علاقات زوجية وبيوت كان الاختلاف حول القطط سببًا فى انهيارها. فى المقابل كان حب القطط سببًا فى جمع الكثير من القلوب وعندما تفتش وراء عدد من الزيجات تجد أن وراءها فى النهاية "قطة".
"منة" و"محمد صاحب القطة" قصة حب "أشهر من نار على علم"
"منة" و"محمد صاحب القطة" هكذا عرفت قصة حب "منة مسعد" وخطيبها محمد على "فيسبوك" لفترة طويلة، حيث تابعت الفتيات على إحدى المجموعات النسائية على "فيسبوك" تطورات قصة الحب أولاً بأول منذ اللحظة الأولى التى التقت فيها "منة" أحد زملاء صديقتها لتتبنى قطته، وتقدم بعدها لخطبتها وعرف بين جميع أعضاء المجموعة بـ"محمد صاحب القطة"، وخلال شهور قليلة نمت قصة حب "محمد" و"منة" وسوف يحتفلان خلال 5 شهور بزواجهما.
"هند" و"أحمد" اتقابلوا فى الثورة وحبوا بعض بسبب القطط
أما "هند عزت" و"أحمد" فقد جمعتهما الثورة وتقابلا فى مظاهرة ولكن حب القطط هو ما حول تعارفهما إلى قصة حب، وتحكى "هند" لـ"انفراد" "إحنا أعضاء فى حزب واحد، كنا لما بنعمل اجتماعات فى الحزب أو عند القهوة بصطاد قطط السلم أو الشارع ألعب معاها، ولاحظت إنه هو كمان بيعمل كده فبقى فى بيننا حاجة مهمة مشتركة، كل ما نشوف قطة نأكلهم ونلاعبهم والقطط ورتنى قد إيه هو حنين، وكان بيفرجنى على صور قططه على الموبايل ولما ارتبطنا وعدنى لما نتجوز نجيب قطط علشان بابا بيمنعنى أجيب حيوانات، وفعلاً اتجوزنا وجبنا قطة اسمها طوفى ولما تتعب بنجرى بيها سوا على الدكتور ولما جالها تسمم كنا بنعلق لها الجلكوز سوا".
عطف "محمود" على القطط طمن "مى" على مستقبلها
أما "مى مجدى" فكان للقطط دور آخر فى علاقتها بخطيبها وتحكى لـ"انفراد" :"فى فترة بعد خطوبتنا كنت حاسة بخوف وعدم راحة وحسيت إنى اتسرعت، لكنى لاحظت إنه حنين جدًا وبيعتنى بقطة عنده على السلم ودايمًا يأكلها وعاملها زى سرير تنام عليه لأنه مش قادر يدخلها البيت لظروف صحية، فحسيت قد إيه هو رحيم بمخلوقات ضعيفة وقلت أكيد هيراعى ربنا فيا".
وأضافت :"موقف تانى قربنى من خطيبى هو إنى لقيت قطة فى الشارع شيرازى، جعانة وبردانة لكن أهلى رفضوا يدخلوها البيت، لكن هو ساعدنى لحد ما أقنعهم وربيتها واتجوزت ودلوقتى عندنا 11 قطة هيكونوا معانا فى بيتنا لما نتجوز".
"حب القطط" لغة مشتركة بين "أمانى" و"أحمد"
"لقيته فاهم زيى إن القطط مش حيوان وخلاص، وعرفت إنه حساس وبيعطف على غيره حتى لو حيوان ودا قربنا جدًا" هكذا بدأت "أمانى محفوظ" حكايتها عن خطيبها "أحمد" وتابعت "خطيبى بيحب القطط جدًا ولما كان بيحكى عنهم وصحابنا موجودين بيستغربوا ازاى بيتكلم كده دى قطط يعنى، بس انا كنت ببقى فاهماه ودا قرب بيننا، وبعد الخطوبة ومعرفته أكتر حبى للقطط زاد شوية بسببه، وما بقيتش ببص لها على إنها مجرد حيوانات مسلية".