البنت بتفكر فى طموحها بتفكر أزاى تبني مستقبلها ... أزاى يبقي لها وضع أجتماعي وثقافي وعلمي ومادي كمان .
البنات مابقاش آخر طموحهم أنها تتجوز وأهو ضل راجل ولا ضل حيطه .
البنت بقت حيطة نفسها ... البنت بقى ليها دخل ثابت ومكانة علمية ووضع أجتماعي مرموق ... البنت أتعلمت أزاى تسند على نفسها وماتستناش تسند على حد .
البنت فى شغلها بقت رئيسة مش مرؤسة ... البنت بقت بتمشى جيش من عينة حضرتك تحت إيديها وماحدش يقدر يقولها لا .
البنت حالياً مابقتش تفكر فى الجواز ولا بيفرق معاها يتقال عليها عانس
أو لا لآن دماغها بقت فى حاجات أهم من الكلام الفارغ ده .
البنت النهاردة بتقول لو مالقتش إللى أرتاح معاه أو إللى ليه عقل وفكر وطموح زيي يبقى قلته أحسن .
الواحدة النهاردة بقت تطلق عادي جداً ومابتفكرش الناس هتقول إيه ولا حتي هيحصل بعد الطلاق إيه ... الواحدة بقت بتقول طالما أنت فاشل ومش عارف يعني إيه جواز ولا عارف قيمته أو أهميته يبقى قلتك أحسن .
أوعي تفتكر للحظة أن فيه واحدة هتقبل بواحد فاشل يدخل حياتها ، الواحدة لو مالقتش واحد ناجح زيها أو أكتر منها كمان ، واحد عارف يعنى إيه حياة زوجية ، يعنى أيه أولاد ومسئولية ، يعنى إيه معني كلمة واحدة ست وأزاى يتعامل معاها فعمرها ما هتقبل بيه بل بالعكس تماماً دي هتطرده من حياتها وعمرها ماهتندم عليه بالعكس ده يوم طلاقها منه هيكون يوم سعد وفرح بالنسبالها وهتلاقيها سنوياً بتحتفل بالذكري السعيدة دي .. ذكري يوم ما طردت واحد فاشل من حياتها وخلصت منه .
أنا عارفة أن كلامي مش عجبك وحقك أنه مايعجبكش بس كمان أنت تصرفاتك وأفعالك مش بتعجبنا ولو أتكلمنا عليها بصراحة هتنتحر لأن الكلام هيوجعك لأننا هنواجهك بحقيقتك إللى أنت مش عايز تشوفها .
وأسمحلى أفهمك حاجة مهمة جداً هناك فرق شاسع بين كلمة " ذكر" وكلمة " رجل " فالأولى نوع والثانية صفة ، ولأنها صفة فالرجال قليلون والذكور كثيرون ... دي حقيقة لازم تواجه نفسك بيها .
بتقولوا الحريم أسترجلت مافكرتش هي أسترجلت ليه ...علشان الرجولة قلت عندنا وبقى الموجود ذكور فأخدت هي الصفة إللى بقت ضايعه فى المجتمع وقالت تنميها هيه ... ماهو زي ما الست بتعرف تربي وبتحافظ على النوع من الأنقراض فهي أقدر واحدة تقدر تحافظ برضه على الصفات الحميدة وتنميها ولو فكرت غير كده تبقى غلطان .
أنت مش عجبك البنات وعمال تعيب على دي وعلى دي وتجيب فى سيرة دي ودي وتجري ورا دي ودي وتضحك على دي ودي وللأسف أنت مش قادر تفهم أن البنت دي هي أمك وأختك وخالتك وعمتك ومراتك وبنتك .
للأسف أنت مش عجبك غير حالك ومش شايف غير نفسك وفاكر نفسك صح على طول بس أحب أقولك كلمتين حطهم حلقة فى ودنك من يوم ما ضيقتوا البنطلونات وسقطوها وطولتوا شعوركم وحطيتوا فيه توكة بقينا أحنا أرجل منكم دي حقيقة للأسف وماحدش مبسوط بيها .
ماتقولش أنك راجل وأنت جاى تتحرش بواحدة ، ماتقولش أنك راجل وأنت جاى تغلط فى واحدة ، ماتقولش أنك راجل وأنت بتمد إيدك على واحدة ماتقوليش أنك راجل وأنت مش عارف تحترم نفسك ، ماتقوليش أنك راجل وأنت بتحترم نفسك بس لما تلاقي إللى يديلك فوق دماغك .
بتقولوا الحريم لابسه كده ليه ، طب قبل ما تقول الحريم لابسه كده ليه ياريت تفتح ألبوم الصور بتاع الست والدتك وبصله شوية لا خليها شويتين ولما تخلصه أوصل لخلاتك وعماتك وأتفرج على صورهم زمان ولبسهم ودقق فيه قوي وفكر وهمه لابسين كده وماشين فى الشارع كان بيحصلهم أيه ، ياتري حد كان بيتحرش بيهم بالقول أو الفعل ؟؟؟
أكيد لا عارف ليه لأن وقتها أبوك وخلانك وعمامك كانوا رجالة ، كان النوع المتوفر فى مصر وقتها رجالة عندهم أخلاق ، عندهم ثقافة وعندهم دين وحط تحت دين دي مليار خط ، كانوا فاهمين وعارفين يعنى إيه تبقى راجل أنما فى زمن ضيقوا فيه البنطلونات وسقطوها وطولوا شعورهم وحطوا فيها توكة هنستني يبقوا إيه ، أكيد مش هنستني يبقى عندهم أدب أو أخلاق أو علم أو ثقافة أو حتي دين .
أحنا فى زمن وصل بيهم الحال أنهم أغتصبوا كلبة ياتري هيقولوا الكلبة
هي السبب وهي إللى أغرتهم مثلاً ولا هيقولوا أصل لبسها بيظهر مفاتنها
أو لبسها ضيق أو كله عري .
الصنف الموجود حالياً وصل بيه الحال أنه لو شاف أى نوعية مؤنثة هيتحرش بيها وهيفكر فيها حتي لو كان المؤنث ده حيوان مش إنسان .
بدل ما توجع قلبك بمين لابسه إيه ومين عاملة إيه فكر هي وصلت لإيه وقت ما أنت عمال تجري ورا دي و دي .
بدل ما تقول دي عماله تغير في ستايل لبسها وشكلها علشان تشد نظري ليها قول دي واحدة بتحب تعتني بنفسها .
بدل ما تقول الصور إللى البنات بتحطها على مواقع التواصل الأجتماعي بتحطها علشان تعجب سيادتك أوعلشان تشد عيون الرجالة وتخليهم يقربوا ليها ... قول من الطبيعي والمنطقى أن أى بني أدم فى الدنيا دي كلها يدورعلى صورة حلوة ليه علشان يحطها على بروفايله والكلام ده ينطبق على الرجالة قبل الحريم لأن ماحدش عاقل هيحط صورة مرعبة أو صورة مقرفة إلا لو كان غير طبيعي أو مجنون .
أحب أقولك صور البنات المحطوطة على مواقع التواصل الأجتماعي مش محطوطة لا علشان تعجب سيادتكم ولا علشان تلم حواليها أى حد وإللى يفكر غير كده محتاج يوصل لحد دكتور نفسي يعالجه من كم الكلاكيع والعقد النفسية إللى عنده .
أنت لو تعرف الحريم قد إيه قرفانه من الصنف إللى منتشر حالياً وبيقولوا على نفسهم رجاله هتقرف شخصياً من نفسك وتتمني لو ماكنتش ذكر
فرق كبير بين كلمة ذكر المكتوبالك فى البطاقة وبين كلمة رجل وإللى يفتكر أن ذكر زي رجل يبقى ده كلام ضد المنطق