الحقيقة إن الحل موجود فى كل دول العالم بعيداً عن شركات التسويق ونظام العينة اللى مهما كانت ممثلة ومختارة يبقى هامش من الخطأ بحكم علم الإحصاء.
فيه جهاز اسمه "People meter" ده حضرتك عبارة عن "بوكس" صغير فى حجم كتاب الجيب قد الكف كده اخترعته شركة بريطانية لقياس مسوح ونسب المشاهدة بطريقة علمية عن طريق تثبيت الجهاز ملحق بالريسيفر أو بالشاشة.. ويتم تسجيل بيانات المشاهد والأسرة بالكامل على سيتسم عبر هذا الجهاز بمعنى أنا x رب الأسرة عندى 45 سنة ومراتى اسمها y عندها 40 سنة وابنى z عندها 15 سنة وعبر أكواد وسيستم.. الجهاز يبدأ يقرأ أنت بتشوف إيه أمتى وفين وبتقلب منين لفين؟.. لا ده مش بس كده كمان لا ده بيقدر لو جالك ضيوف إنك تسجلهم وتقدر ترصد هما كمان بيشوفوا إيه؟
الجهاز ده يقدر يرصد إن محمود كل يوم حد واتنين وثلاثاء وأربعاء بيشوف من 9 لـ11 قناة cbc فيقوم مسجل ده تلقائى ويتعرف إن ده برنامج هنا العاصمة للميس الحديدى.. ومراته بتشوف النهار الساعة 3 العصر كل يوم فيطلع الشيف علاء شربينى مثلاً.. وابنه بيتفرج على أون تى فى كل يوم من 2 لـ6 فيطلع الكابتن مدحت شلبى والدورى العام.
الجهاز ده ليه سيستم صارم جدا بيخلى نسبة الخلل والتلاعب فيه شبه معدومة ومتجرب وهو ده اللى بيعتمدوا عليه فى كل دول العالم.. الجهاز ده شغال فى 42 دولة كلهم أبرزهم أمريكا وأوربا والإمارات أيوة حضرتك دبى والدول المحترمة جيرانا دوول شغالين بـ"People meter".
فالجهاز ده ببساطة شديدة يقدر يطلع نتائج تخلى شركة مثلاً زى بتاع شاليهات وعقارات لفئة A تعلن فى برنامج معين على قناة معينة.. ومنتج تانى شعبى مثلاً يتعرض فى البرنامج الفلانى على القناة الفلانية الساعة كذا.. طيب ايه أهمية ده اصلاً؟
أهمية ده بيخلى المعلن يدخل بقلب جامد ويدفع فلوس محترمة علشان ضامن ومتأكد - وفق السيرش والبحوث والجهاز ده- إن مستهدف ناس معينة هتيجى لو عامل إعلان كويس وجذاب هتشترى وهيبيع وهيكسب.. فبالتالى القنوات تكسب والسوق ينتعش، لكن اللى بيحصل دلوقتى إن أغلب بحوث المشاهدة مشكوك فى صحتها وفيه 100 اتهام واتهام ومحدش عارف مين رقم واحد ولا رقم اتنين ولا مين بيتشاف فين ولا امتى؟.. فالمعلن يخاف وبدل ما يحط ميزانية ضخمة وكبيرة للإعلانات يتعامل بمنطق "التلويش والتنقيط" يبدأ يجرب بشكل عشوائى فى مجموعة حاجات ويعمل الحملة على كذا مدة علشان يقدر يشوف النتائج إيه ويحسب حسابات التكلفة والعائد اللى بتسمى فى علم الاقتصاد والإحصاء cost benefit analysis
الجديد بقى إن فيه شركة عالمية وكيلها هنا رجل فى سوق الميديا والتسويق فكر إنه يشتغل بحرفية ويريح السوق من خناقة كل موسم ع الكحكة إنه يجيب الجهاز ده ويشغله فى مصر اللى هو كله بالمناسبة يعملوا حوالى 250 دولار.. لكن.....
أيوه زى ما حضرتك وقفت وفكرت وتوقعت كده.. كان لازم موافقة الدولة.. الراجل بعت جاب حوالى 20 جهاز.. ولكن الجمارك منعت دخولهم باعتبارهم أجهزة شبيه بالتجسس بعد مصادرة الطائرات الصغيرة، هل من الممكن أن يسمحوا بدخول مثل هذا الجهاز، وبعد عدة محاولات واتصالات بمسئولين وجميعها باءت بالفشل، ويبقى هو المتضرر بدفع أموال بسبب وجود الأجهزة.. وكانت الرسالة: "إحنا عايزنها كده.. مش هنسمع لحد يعرف مين بيسيطر على الناس وبيتحكم فى الرأى العام".