مقبرة «برج سما»

مقبرة «برج سما» عارف حضرتك اللى خد 19 قفا على سهوة، وقال «كمان»؟!.. على الطريق الدائرى من التجمع للمعادى «نقطة موت» مشهورة جدا لرجال الإسعاف والمرور والداخلية والمحافظة والحكومة، اسمها «مخرج السخنة عند برج سما»، هذه النقطة يحدث فيها يوميا أكثر من حادثة، ويموت فيها يوميا فى المتوسط من 7 لـ15 مواطن، أيوه، يوميا.. فماذا فعلت الحكومة؟ المحافظة؟ الداخلية؟ المرور؟! طبعا ولا أى حاجة، كل يوم بيروحوا يشيلوا الجثث، لا أكتر ولا أقل، لدرجة إننا لو شيلنا رئيس الوزراء وحطينا مكانه «حانوتى»، هيبقى مفيد أكتر، يا ريت سيادته يشوف حل لنزيف الأسفلت فى هذه النقطة، حسبنا الله ونعم الوكيل. اللى يعاكس المدام.. يبقى حكم على نفسه بالإعدام صباح الخير عزيزى المواطن، ومع الحالة الفريدة الجديدة لضباط الداخلية اليوم، حيث قررت نيابة حوادث جنوب القاهرة التحفظ على السلاح الميرى الخاص لضابط شرطة بقسم دار السلام بعد إطلاقه النار بطريقة عشوائية وإصابة مواطن، بعد تعرض زوجته للمعاكسة، وطبعا الفنان محمد رمضان هو المسؤول عن بلطجة الشعب والشرطة، مش هو اللى قال: «اللى يعاكس المدام.. يبقى حكم على نفسه بالإعدام»، يا ريت الداخلية تدى الظابط مكافأة، وتحبس محمد رمضان، ومصر جميلة.