اركب التاكسى الأبيض.. ولا تجعله «يركبك»
تعريفة التاكسى الأبيض غليت، فتح العداد بقى بـ«4 جنيه» بدل 3، والكيلو متر بقى بـ«175 قرش» بدل 140، اللوا عاطف يعقوب، رئيس الجهاز المحترم «حماية المستهلك» بيقدم 3 نصايح فى حالة عدم استجابة أصحاب التاكسى الأبيض للتسعيرة الجديدة، أهمها أن يبدأ المواطنون فى تطبيق ثقافة السيارة المشتركة، واستخدام مترو الأنفاق، وفتح الحكومة لتراخيص جديدة للتاكسى الأبيض لخلق نوع من المنافسة.. وأنا شخصيا بقدم لك النصيحة الرابعة ومن غير تشاؤم.. سلمها لله، مفيش حاجة هتتعدل.
نصدق مين فيكم؟!
قالوا الجمل طلع النخلة، قلنا آدى الجمل وآدى النخلة، وآدى وزير الصحة، وآدى المصرية للأدوية، طب إيه الحكاية؟!.. طبعا الدوا ناقص والناس بتموت، فتيجى وزارة الصحة وتقول: «خلاص، الأزمة انتهت.. انتهاء أزمة نواقص الدواء، وإحنا كلفنا الشركة المصرية للأدوية باستيراد 146 صنفا دوائيا متعلقا بالأورام ومشتقات الدم والتخدير والطوارئ والفشل الكلوى، جميل؟!.. لأ طبعا مش جميل، لأن الدكتور عادل طلبة، رئيس المصرية للأدوية، قال: «وزارة الصحة ما كلفتناش بحاجة».. طب انتو أحرار مع بعض.. الناس العيانين يعملوا إيه؟!.. يروحوا الصيدليات يصرفوا تصريحات مثلا؟ ولا يموتوا؟!