تساؤلات كثيرة أثارها رفع سعر الدولار أمام الجنيه المصرى رسميا طبقا لقرار البنك المركزي ليصبح 8.95 قرشا بدلا من 7.83 قرشا، وتناول العديد من مستخدمي موقع فيس بوك "تحليلا" يلمح إلى أن هناك مستفيدون من هذا القرار على غرار ما حدث من فضيحة تعويم الجنية المصري أيام حكومة عاطف عبيد في عهد محمد حسني مبارك.
وينشر موقع انفراد ذلك التحليل الذي تم مشاركته بأكثر من أكثر 6 آلاف شخصا بموقع فيس بوك وجاء فيه:
بتاريخ الاثنين ٢٢ فبراير ٢٠١٦ من ٣ أسابيع محافظ البنك المركزي طارق عامر قال في فيديو مصور : «السيسي يتركنا نبدع.. ولا نفكر في تخفيض قيمة الجنيه»
بتاريخ ٨ مارس قرر البنك المركزي برئاسة طارق عامر ان يلغي الحد الاقصى للإيداعات في البنوك يعني بدل ما كنت تقدر تودع مبلغ محدد يوميا تقدر تودع بدون حد اقصى يعني تشتري دولارات او تدبرها من البنك براحتك و تحط في حسابك البنكي يا معلم.
بتاريخ الخميس ١٠ مارس ٢٠١٦ بعد يومين من رفع الحد الاقصى للإيداعات بالنقد الأجنبي : أعلن البنك المركزى المصرى يوم الأحد ضخ 500 مليون دولار فى عطاء استثنائى بديلًا عن العطاء الدولارى الدوري الذى كان مقررًا اليوم بنحو 40 مليون دولار للبنوك العاملة فى السوق المحلية بسعر 7.8301 جنيه للدولار.
يعني البنك المركزي باع ٥٠٠ مليون دولار "نص مليار دولار" للبنوك بسعر 7.83 جنية ... باع امتى؟!!! بتاريخ ١٠ مارس و البنوك باعت جزء من الفلوس دي لمستثمرين وأفراد و(مؤسسات) والباقي احتفظت بيه منهم بنوك حكومية وبنوك أجنبية يعني اللي اشترى من اسبوع سواء البنوك أو اللي اشترى من البنوك اشترى بسعر 7.83 جنية.
- بتاريخ لمبارح اللي هو ١٤ مارس يعني بعد ٤ أيام فقط من بيع طارق عامر لنص مليار دولار بسعر 7.83 رفع طارق عامر سعر الدولار ليصبح 8.85 قرش يعني بزيادة سعر 1.12 قرش يعني اللي اشتروا النص مليار دولار من ٤ ايام فقط كسبوا رسمي فهمي نظمي 1.12 على كل دولار يعني كسبوا في ٤ ايام فقط ٥٦٠ مليون جنية بسبب قرار طارق عامر في خبطة واحدة .
السؤال الاول: لما النية مبيته لرفع سعر الدولار ليصل قيمته 8.85 جنية بشكل رسمي ليه طارق عامر باع 500 مليون دولار من ايام بس بسعر 7.83؟ مهو مصحيش امبارح الصبح قال اية الزهق دة انا هخفض قيمة الجنية قصاد الدولار ... لا طبعا القرار ميعادة متحدد من فترة.
السؤال التاني: مين هيتحاسب على اهدار فرق السعر بين 7.83 اللي اتباع به الدولار من ٤ ايام و سعر امبارح 8.85 ؟ كدة في ٤ ايام طارق عامر مخسر الدولة 560 مليون جنية لأنه بايع الدولار بالرخيص بسعر مدعوم من ٤ ايام بس نص مليار دولار مخسر خزينة الدولة على كل دولار 1.12 جنية شوف انت 560 مليون جنية فرق سعر دول فيهم كام تصبيحة على مصر من اللي قال عليهم السيسي.
السؤال التالت : هل تم توجيه الدولارات دي من البنوك لصالح حسابات عملاء معينين سواء افراد او مؤسسات او شركات بعد قرار رفع الحد الاقصى للإيداعات اليومية؟!!
السؤال الرابع: لو انت عايز تخفض قيمة العملة بفرض حس النية (اللي مش موجود) ازاي فجأة تخفضه 14% ليه محصلش دة بشكل تدريجي كل يوم قرش صاغ او اتنين؟!!
ةالمفاجئة ان قرار بيع ال 500 مليار دولار حصل بعد ما البنك المركزي رفع الحد الاقصى للإيداعات اليومية داخل الحسابات بيومين يعني من الاخر القرار متفصل عشان النص مليار دولار المدعومة تتباع و تدخل حسابات بدون حد اقصى و بعد 4 ايام اللي اشترى كسب 1.12 لكل دولار.
المهم ان طارق عامر عشان يغلوش على النص مليار دولار اللي باعهم من كام يوم واتعمل بيهم السبوبة بالسعر القديم راح طرح بالسعر الجديد 200 مليون امبارح و 200 مليون النهاردة قال يعني بيغرق السوق دولارات عشان يقضي على السوق السودة اللي هي في الأساس مستحيل تخسر البلد في ٤ أيام ٥٦٠ مليون جنية بس الباشا عملها و خسر خزينة الدولة فرق السعر.
وفي السياق ذاته أبرزت تصريحات صحفية لفتحي الطحاوي نائب رئيس شعبة الأدوات المنزلية بالغرفة التجارية في القاهرة، إن البنك المركزي تعمد تبديد 550 مليون جنيه من خزانة الدولة، بعد أن طرح ٥١٠ ملايين دولار في عطاء استثنائي ضخم الأسبوع الماضي، بسعر 7.83 جنيها، رغم أنه كان يعتزم خفض قيمة الجنيه أمام الدولار بنحو 112 قرشًا ليصبح 8.95 جنيه.
وتسائل الطحاوي، "لصالح من.. ومن المستفيد من تلك المبالغ؟ إذا كان المركزي قد طرح هذا المبلغ الضخم وهو لا يعلم أنه سيخفض قيمة الجنيه فتلك كارثة.. وإن كان يعلم فالكارثة أخطر"، على حد قوله.