دائما ما تتفاعل السوشيال ميديا مع الأحداث الغريبة غير المعتادة، ولكن ما حدث مؤخرا مع فيديو الراقصة الطائرة أثار الجدل على نطاق واسع ووصل الأمر إلى حد التحقيق فيه من الجهات المسئولة.
فيديو غريب ومثير للجدل انتشر فى الآونة الأخيرة على كافة مواقع التواصل الاجتماعى فى مصر، لفتاة ترقص في الهواء في أحد الأفراح الشعبية محلقة فوق رؤوس البشر، حتى أن من يرى الفيديو لأول ثانية يعتقد أنها معلقة في الهواء وأن بها قوة خارقة، غير أنه مع تدقيق النظر قليلا نكتشف أنه استعراض من غريب، حيث تظهر الفتاة معلقة من شعرها لترقص فوق رؤوس المعازيم، فى أحد الأفراح الشعبية بمحافظة الدقهلية، وهو ما أثار موجة غضب كبيرة وأصبح حديث رواد مواقع التواصل، الذين لم يقبلوا بتعليق فتاة صغيرة من شعرها بهذا الشكل، باعتبار أن ذلك انتهاكا لطفولتها وآدميتها، بينما الفتاة كان لها رأى آخر حينما التقيناها.
ففى حلقة جديدة من برنامج "فتحى شو"، ظهرت الفتاة "بسكوتة"، وهذا هو الاسم المستعار لها والمستخدم فى الحفلات التى تحييها، واسمها الحقيقى "ميادة" مع المذيع محمد فتحى فى أول لقاء لها لتسرد للجمهور ما حدث والحقيقة الكاملة للفيديو المثير للجدل .
قالت "ميادة" عن هذا الظهور الغريب: "الفيديو المنتشر ليا على السوشيال ميديا قديم ومش جديد، وكان فى فرح"، مبررة ذلك بأنه "فن من الفنون اللى بنقدمها فى السيرك وأنا أصلا لاعبة فى السيرك الخاص بجدى والد أمى".
أضافت الفتاة:" جدى وهو اللى علمنى الأكروبات ديه بعد ما طلبت منه وبعد ما شوفت خالاتى بيلعبوها وحبيتها واتعلمتها بعد تمرينات كتيرة جدا وتقريبا يومية عشان أوصل للمرحلة اللى انا فيها ديه".
وتابعت: "انا مش قاصر زى ما الناس روجت على السوشيال ميديا وطالبت حقوق الطفل بالتدخل، انا عندى 19 سنة ونص ومسئولة عن نفسى، واللى بعمله ده فن من فنون السيرك على مستوى العالم وبلاد بره الفن ده منتشر فيه ومعروف جدا، وانا بعمله هنا فى مصر بس مكنتش متخيله انه هيعمل ضجة كبيرة أوى كده، انا مش رقاصة انا بستخدم بعض حركات الرقص عشان الناس يعجبها، والناس بتكون مبسوطة جدا وانا بعمل الاكروبات وهدفى الأول هو اسعادهم وبقدم الفن بطريقة غريبة تجذب الناس".
وعن طريقة ظهورها قالت: "مينفعش البس بدلة رقص لانى انا مش رقاصة انا بحرك الناس بشوية رقص منى بس لكن انا مش رقاصة وبخلى الناس تتبسط أكتر، والاكروبات اللى بعملها ديه محتاجة شعر قوى وانا بهتم بشعرى وبتغذيته، محدش جابرنى على الشغلانة ديه انا اللى حباها وانا اللى بشتغلها وباخد فى اليوم 500 جنيه، والشغلانة محتاجة تمرينات وشعر قوى طويل".
واكملت: "فوجئت أن خالى كلمنى فى يوم وقالى الفيديو بتاعى مبهدل الدنيا وعامل حالة جدل، انا كنت مبسوطه انى بقيت مشهورة كده والناس كلها اتفرجت على الفيديو.
وعن التعليقات وردود الفعل قالت:"بالنسبة للتعليقات اللى على الفيديو انا مقريتش ولا واحدة منها لانى مش مهتمة، فى ناس مقدره فنى ده وفى ناس مش عرفاه بس اللى باسطنى انى بقيت عالمية وكل الناس شافونى".