حرم الرئيس السيسى عن أول لقاء بينهما:البداية تحسسك إن الإنسان ده مسئول..مكنتش بعرف أعمل الأكل فى بداية الجواز وهو اللى علمنى..زوجات الضباط يتحملن المسئولية من الألف للياء..عشنا فى أحياء شعبية حيث الأص

روت السيدة انتصار السيسي، حرم الرئيس عبدالفتاح السيسي، تفاصيل أول لقاء بينهما، قائلة: "هو جه عند جدتى اللى هى خالته، أول ما كلمنى ماحستش إنه واحد جاى يحب.. ده بيقولى أنت بتذاكرى كويس، وقالى ورينى كده - كنت عاملة جدول امتحانات – قالى ذاكرى كويس، لأن المذاكرة دى هى اللى هتوقف جنبنا، قلتله: جنب مين؟ أنا أصلا لسه يدوب بتعرف". وأضافت حرم الرئيس السيسي، خلال حوارها مع الإعلامية الكبيرة إسعاد يونس، عبر فضائية "DMC": "كانت البداية فيها جدية، تحسسك إن الإنسان ده مسئول، واتكلمنا وعرفت منه إيه السبب اللى خلاه يبقى عاوز المواصفات دى، لأنه هيبقى ضابط، وهيبقى مسئول، ومش هيكون متواجد بالبيت فعاوز اللى يختارها تكون قد المسئولية اللى هتمشى معاه مشوار حياته". السيدة انتصار السيسي: مكنتش بعرف أعمل الأكل فى بداية الجواز وهو اللى علمنى قالت السيدة انتصار السيسي، حرم الرئيس عبدالفتاح السيسي، إن شخصية الرئيس السيسى لم تتغير إطلاقا، مضيفة: "من أول الجواز، ومكنتش بعرف أعمل أكل وهو اللى علمنى.. ووقف معايا وساعدنى بمنتهى طول البال والحنية.. هو إنسان حنين على أسرته كلها". وأضافت حرم الرئيس السيسى:"الرئيس كان حنين على الأسرة الكبيرة والدته وأخواته وهذه أكثر صفة تصفه الناس بها.. حنيته على أهله". حرم الرئيس السيسي تكشف عن وصية والدتها عند الزواج كشفت السيدة انتصار السيسي، حرم الرئيس عبد الفتاح السيسي، عن نصيحة والدتها عند زواجها، قائلة: "والدتى قالت لى أنا مش عاوزة أقولك على حاجة عشان عارفة إن أنت متربية صح وطبيعتك هتتآلف مع أى طبيعة فى الدنيا، وأنت داخلة على أسرة أصلا أسرتنا كلنا، ومش هتبقى محتاجة أنصحك فى حاجة، لأن طبيعتهم زينا ومش هتلاقى غربة فى أى تصرف". وأضافت حرم الرئيس السيسي،: "الكلام دا إدانى ثقة فى نفسى، ونجحنا كأسرة واحدة، وكانت أمنية حياتنا إننا نبقى دايما مع بعض". السيدة انتصار السيسي: زوجات الضباط يتحملن المسئولية من الألف للياء قالت السيدة انتصار السيسي، حرم الرئيس عبدالفتاح السيسي، إن زوجة أى ضابط سواء فى القوات المسلحة أو الشرطة، تتحمل المسئوليات بشكل كبير، مبينة: "بتتحمل المسئولية من الألف إلى الياء، مسئولية الأولاد والبيت وكل حاجة، وبتكون أب وأم في نفس الوقت، لأن هو غصب عنه مش بيكون متواجد". وأضافت حرم الرئيس السيسي، عدم تواجد الزوج الضابط مع أسرته لا يعنى أنه منفصل عن العائلة تماما، موضحة: "بالعكس كنا على طول بنتكلم وكان فيه تواصل دائم، رغم إن ساعتها التليفونات ماكنتش متاحة زى دلوقتى، وكنا بنتواصل فى أى حكاية بتخص الأولاد كأنه موجود معانا". وروت حرم الرئيس السيسى قصة زواجها بالرئيس السيسي، قائلة: "اتكملنا وهو ماشى رايح الكلية، وقالى هاجى الصبح أسلم عليكى فقلت لخالتى منين هو واثق إنه جاى يسلم عليا وهو ماشى، وأنا كنت ساعتها مترددة بس لقيت نفسى قعدت وبدأت العلاقة، وهو راح الكلية وأنا حسيت بارتياح بأن الشخص ده شخص مهذب ومختلف". السيدة انتصار السيسي تكشف عن وصية والدة الرئيس للعائلة كشفت السيدة انتصار السيسى، حرم الرئيس عبدالفتاح السيسي، عن وصية والدة السيد الرئيس لها، قائلة: "لم تنصحنى لوحدى بل نصحت كافة فتيات وصبيان العائلة كوننا نعيش في بيت واحد.. وكنا في بيت والده بمدينة نصر وكل البنات والصبيان جميعاً في بيت واحد.. وأنا دائماً أحب أقول إن والدته كانت أم مش علشان هي تعتبر خالتى لا لأنها كانت معانا كلنا كدة". وأضافت حرم الرئيس السيسي، أن والدة الرئيس السيسى جمعت أبناء العائلة وأوصتهم قائلة: "اللى ينجح البيت إن كل وحدة فيكم يكون ليها خصوصية وتبقى عارفة إيه الكلام اللى يقال والذى لا يقال.. وكل وحدة فيكم حرية شخصية تعتبر أنها في بيت لوحدها.. وكلكم أبنائي وحبايبى البنات زى الصبيان". حرم الرئيس السيسي: والد الرئيس إنسان جاد وورثوا منه حسن الإدارة قالت السيدة انتصار السيسى، حرم الرئيس عبد الفتاح السيسى:"أنا عندى أخ كبير وبعديه أختى وبعدين أنا وبعدين مصطفى أخويا الله يرحمه أصغر واحد فينا". وأضافت حرم الرئيس السيسى، والدى دائما كان يقولى احتفظى بهدوءك وطبيعتك الجميلة متغيريهاش، لأنى واخدة الطبيعة دى من بابا، هو إنسان هادى جدا جدا، وكلامه قليل وبيميل للهدوء والراحة، وهو كان بيحب الصيد ويحب يروح مع أصحابه رحلات صيد كتير، ودى اللى خلته طبيعته تبقى هادية". وعن والد الرئيس عبد الفتاح السيسى، قالت: "باباه طول عمره إنسان جاد، والمحلات بتاعة خان الخليلى بالرغم إنها كانت كتير إلا أنه بيديرها إدارة رائعة وأولاده كلهم خدوا منه حسن الإدارة، وكان عنده كمية عمالة كتير جدا، وهم خدوا منه الالتزام". السيدة انتصار السيسي: "اتجوزنا يوم الخميس ونزل شغل الأحد" أكدت السيدة انتصار السيسي، حرم الرئيس عبدالفتاح السيسي، إنها لم يجمعها بالرئيس عبد الفتاح السيسى "شهر عسل"، قائلة " "بعد ما اتجوزنا كنت أنا خلصت الكلية وهو ماكنش عنه وقت لشهر العسل خالص، وإحنا اتجوزنا يوم الخميس وكان يوم الأحد في الشغل" أضافت حرم الرئيس السيسي،":وهو بيحب شغله جدا وليه ديما أسبقية في تفكيره للمرحلة اللى هو داخل عليها" ، مشيرة الى أن الرئيس : "بيحب كمان المتابعة، ولما بيكون موجود في مكان يحب جدا يكون عارف كل تفاصيله. عن أول مرة تدخل فيها المطبخ بعد الزواج قالت السيدة انتصار السيسى : "كنت ديما بحب اللى يجيلينا نعزمه على الغدا أو العشا، فكانت دي فرصة أنى أدرب بقى، وأنا بحب الطواجن اللى في الفرن، والرئيس بيحب كل أنواع الخضار ويمكن الأولاد طالعين نفس الحكاية، وهما تقليديين جدا، والسلطة لازم تكون معمولة كويس جدا وكل أنواع الخضراوات تكون فيها، والحلو كنافة أو بسبوبة والأولاد طالعين بيحبوا الحلويات الشرقية". السيدة انتصار السيسي: عشنا فى أحياء شعبية حيث الأصول والمحبة قالت السيدة انتصار السيسي، حرم الرئيس عبدالفتاح السيسي، إن أسرة الرئيس كانت تقيم فى حى الجمالية، موضحة: "كنا فى شارع الجيش.. كان من الأحياء الشعبية حيث الأصول والمحبة والجيرة.. والجيران كان لها وضع خاص بالنسبة لكل الدنيا، ولو فيه مناسبة سعيدة كلهم بيتكاتفوا ويقفوا مع بعضهم وكذلك فى المناسبات غير السعيدة". وأضافت حرم الرئيس السيسي، أن "هذه الأمور ضمن الأشياء التى أثرت على الرئيس في الحكم على المرأة المصرية بطريقة مختلفة، حيث رأى أن الست المصرية بتتعب وتشقى، وأمنية حياتها تشوف ولادها سعداء.. وأنها لا تفكر فى نفسها بل فى إن الأسرة تكون سعيدة".











الاكثر مشاهده

مطار القاهرة يستقبل ويسير 4 رحلات جوية من وإلى قطر اليوم بعد توقف 3 سنوات

ارتفاع وفيات كورونا فى المكسيك إلى أكثر من 140 ألفا

إسرائيل تسجل 5616 إصابة جديدة بكورونا خلال 24 ساعة

أهداف وملخص مباراة نابولي ضد فيورنتينا في الدوري الإيطالي

مطار القاهرة يبدأ في تطبيق إجراءات جديدة للسفر إلى إنجلترا وفرنسا

تنامى إصابات كورونا يبدد موجة صعود النفط بعد تخفيضات المعروض

;