فى حوار ملىء بالصراحة والمفاجآت، تحدث الموسيقار هاني مهنا، لـ"تلفزيون انفراد"، عن كواليس وأسرار جديدة، عن فترة تواجده بالسجن، وتفاصيل انفصاله عن الفنانة والمطربة سميرة سعيدة، بالإضافة لقصة زواجه من "فرنسية" وإنجابه الفنانة هنادي مهنا.
وأكد الموسيقار هاني مهنا، أنه تزوج 3 مرات، الأولى بلبنانية ثم سميرة سعيدة والزوجة الأخيرة فرنسية الجنسية، مضيفًا:"حسنى مبارك بعدها قابلني وقال لى إيه ياعم هاني.. عمال تتجوز في أجانب وياخدوا جنسية، وإحنا بنقول إن التعداد السكاني بيزيد.. أنت بتتحداني ولا إيه؟.. فقلت له له مش بتجوز مصرية عشان الخلافات.. لكن الأجنبية لما تلم الشنط وتحجز الطيارة بنكون خلاص اتصلحنا".
وأضاف "مهنا" :"تزوجت صغير عشان احترفت الفن بدرى، وكنت باخد مرتب كويس وأنا في 2 ثانوي، واشتغلت في مسرح منوعات، وكنت باخد 45 جنيها في الشهر.. وناظر مدرستي كان بياخد 13 جنيها".
وتابع: "كان شغال معايا محمود شكوكو وعبد المطلب وعمر الجيزاوي في برنامج 10 فقرات كل يوم، والفلوس كانت بتجري في إيدي، والزواجة الأولى استمرت 21 عامًا، وبعدها جاءت سميرة سعيد".
أول ما طلقت سميرة سعيد "وقعت على الأرض"
كما كشف الموسيقار هاني مهنا، أسباب وكواليس انفصاله عن المطربة سميرة سعيد ، قائلًا: "جبت من الزوجة الأولى تامر وريم، وقلت لها مش عاوز ولاد، وقالت لى وأنا كمان.. مش هخلف، واتفقنا على كدا، لكن فوجئت بعد الزواج بـ، 5 سنين، ووالدتها زنوا في وندها وقالت إنتى مجنونة إزاى ميكنش ليكي ذكرى في حياتك يفكروا فيكي ويورثوكي.. الزن كتير.. وقالت لى ممكن نجيب ولد أو بنت.. فصعبت عليا الصراحة.. وحاولنا الإنجاب وذهبنا للأطباء وسافرنا باريس وأجرينا عملية أنابيب فشلت.. وقعدت شهر كامل.. ورجعنا بس مفيش نصيب.. وحصل ما بينا قفلة، وربنا ما أردش ألبي ليها الطلب.. ثم فوجئت بها تطلب الانفصال بعد الانتهاء من موسم الحفلات، ولكن طباع الرجل المصري الشرقي مختلفة، ولا تعرف ذلك.. مش المرأة اللى تحدد الانفصال والرجل لازم يكون ليه رأي وهو القائد في الموضوع ده".
وواصل: "تربست في دماغي، وعملت حاجة غريبة شوية.. قلتلها خلصى وتعالى المكتب.. وكلمت فريد الديب.. وجبت مأذون لابس بدلة.. وفريد الديب أول ما عرف قالى أحسن.. مكنش بيحب سميرة.. وبالفعل جاء المأذون .. وجهزت الشهود والمأذون، وفاجئت سميرة بهم.. وقلتلها هننفصل.. بس مش هتخلى عنك.. صعب عليا إنها تحدد الانفصال.. وفعلًا مضت وبعدها وقعت على الأرض.. وجبنالا ليها ليمون.. وقعت من زعلها على العلاقة.. مكنتش متخيلة الانفصال.. وكنت حاسس إنها عاوزة ترجعلي".
حجزت مع سميرة سعيد بعد الطلاق في "سويت واحد"
كما واصل الموسيقار هاني مهنا، عن كواليس انفصاله عن المطربة سميرة سعيد، موضحًا أنه بعد انفصالهما مباشرة كان لديهم حفلة في الولايات المتحدة الأمريكية، وقررا استكمالها رغم الطلاق.
وقال "مهنا"، :" عملنا كل ما بوسعنها عشان نجيب عيل عشان تكتسب في حياتها طفل تعيش بيها، لكن لم يشاء الله.. وكنت حاسس إنها عاوزة ترجعلي"، مضيفًا: "بعد الانفصال كان معانا حفلة في أمريكا.. ولم أتحدث إلى المتعهد لحجز إقامة جديد، رغم أنها حجز لنا غرفة واحدة.. وبعد وصولنا لنويوريك .. سميرة مكنش ليها صوت خالص، وكان معانا حفلة في أتلانتا .. وكانت تعانى من دور برد شديد، وذهبنا للحفلة واعتذرنا للجمهور عشان تعبها".
وتابع:" كنا في سويت واحد.. بس والله العظيم تلاتة أخوات.. كنت مصر على الالتزام.. في الحالة دى مفيش حتى بوسة في الخد.. والتزمت وانفصلنا والتزذمنا قدام ربنا.. كنت بحبها جدًا بس موقف الإنجاب كان سبب الطلاق".
زوجتي الفرنسية تربيتها "فظيعة" و"أشهرت إسلامها"
وذكر الموسيقار هاني مهنا، أنه ارتبط بزوجته الأخيرة الفرنسية الجنسية، مضيفًا:"ارتبطت بيها بعد طلاقي بسميرة سعيد.. كنت عاوز أقطع أي حبل بيها.. وشاء الحظ أعمل عملية أطفال أنابيب وتيجي بنتي هنادي منها.. هنادى كان معاها ولد تؤام في الحمل.. والدكتور أخطأ.. والإبرة دخلت في الولد، ومات داخل الأنبوب".
وواصل:"كان يجمعنا ثقة متبادلة ما بيني وبين سميرة سعيد، وتصريحاتها عن انفصالنا محصلتش"، مضيفًا أنها لم يكن يغير عليها حيث أنه جمعتهما ثقة كبيرة.
وتابع :" لما تزوجت الفرنسية مكنتش تقدر تحط روج قدام والدتها.. استحالة بنت تدخل البيت بعد 8 بالليل.. تربيتها فظيعة، وأعلنت إسلامها".
هل تعرض "علاء مبارك" لـ"السم" في السجن؟
وعن فترة تواجده بالسجن، أشار إلى أن علاء مبارك أصيب بمغص وإسهال بعد 15 يومًا من دخوله السجن، وكان هناك شكوك في تعرض لـ"السم"، موضحًا :" بعد 15 يوام من دخول علاء مبارك السجن، جاله إسهال ومغص وشكوا إنه يكون تسمم .. ولكنه اتعالج .. كان مجرد شك.. وحرجوا عليه أن لا يأكل من أي أحد.. ولكن بياكل من أكلى.. ووالدة زوجتي كانت بتعمل أكل فظيع.. عملت 30 حمامة وأرسلتهم لينا".
وعن زواج ابنته هنادي بأحمد خالد صالح، قال: "حسيت إنه ابني.. وقلت له أنت بتاخد قرة عيني وحتة من أعضاء جسمي.. واللى عاوزه منك.. بلاش خلافات وأى حاجة تضايق ارجعلى.. أنا مكان أبوك.. وهو بيحب هنادي جدًا.. وأرى أن الزواج الاجتماعي الفني خطر جدًا .. الفنانين لازم يكونوا في كفتين متوازيتين".