تعاطف الفنانين مع شيرين عبد الوهاب.. كندة علوش: قمر بكل حالاتك.. سمية الخشاب: حبي نفسك وقدريها.. نيرمين الفقى: أهم الأصوات المصرية والعربية.. صبرى فواز: بنحبك

تعاطف عدد كبير من نجوم الفن مع النجمة شيرين عبد الوهاب، بعد أن تخلت عن شعرها في حفلها في الإمارات، وذلك بعد انفصالها عن الفنان حسام حبيب، وتلقت العديد من رسائل الدعم لها. وكتبت النجمة كندة علوش، قائلة: "انت قمر بكل حالاتك.. وزادت حلاوتك وتعملي اللي يعجبك طالما مش بيضر حد وحشتينا وكلنا منتظرين جديدك والأهم.. تكوني مرتاحة وفرحانة". وقالت النجمة سمية الخشاب: "شيرين الإحساس والإبداع كلنا بنحبك وبنعشق صوتك وإحساسك، يلا بقي عايزين أغاني تكسر الدنيا كالعادة، واللي فات مات بكره أحلى وأجمل وأرجوكي بقي حبي نفسك وقدريها وخافي عليها ودلعيها لأنها تستحق". وكتبت مى كساب عبر حسابها على تويتر: "يا شيرين قابلينك وفاهمينك واللي مش فاهم مش مهم يفهم مش مضطره تبرري بس ردي على التليفون عشان وحشتيني يا بنت عاوزه أسمع صوتك وبعدين شعرك بيطول بسرعه إحنا عارفين المهم إنك إرتاحتي يا أختي العزيزة". ونشرت مى نور الشريف، صورة لشيرين بمظهرها الجديد، عبر حسابها على إنستجرام، صحبتها بتعليق: "أنا متعرفتش عليكى فى الحقيقة، بحبك كمعجبة لمغنية موهوبة شاطرة، أنا بحبك جدا دلوقتى كإنسانة وبحترمك جدا، ربنا يديم عليكى قلبك الحلو ويحفظهولك". وأضافت مى: "أصعب شيء أننا نمر بالوحش ونقدر نحافظ على نقاء قلبنا وروحنا من قسوة الحياة وأنتى نجحتى فى ده، ربنا يديم عليكى نعمة الرضا والنجاح وحب الناس، فى انتظار أحلى الأغانى من أحلى صوت شيرين عبد الوهاب". وجهت النجمة نيرمين الفقى، رسالة تضامن ودعم للنجمة شيرين عبد الوهاب، بعد أن قصت شعرها بالكامل، وقالت نيرمين، عبر حسابها على إنستجرام: "أول مرة أكتبلك عشان أنا حاسه بيكى، حبيبتى انتى قمر فى كل أحوالك، عايزه أقولك إن الجمال الحقيقى للإنسان هو جمال الروح والإحساس والطيبة والأخلاق الطبيعية والتلقائية والتواضع، خليكى واثقة إننا كلنا بنحبك، أنتى من أهم الأصوات المصرية والعربية". وأضافت نيرمين: "كلنا بنمر بصعاب وأوجاع مختلفة، بس بنكمل لأن الحياة جميلة بحلوها ومرها، انتى ربنا اداكى نعم كتيرة وجميلة، أهما أولادك وحب الناس، كملى ومستنين على أحر من الجمر أغانى تكسر الدنيا، بحبك جدا". وكتب الفنان محمد على رزق، عبر حسابه الرسمى على موقع التواصل الإجتماعى " فيس بوك": أى حد بيتريق على شيرين يبقى مريض نفسى واضح جداً إن تجربة جوازها كانت قاسية و صعبة وكانت بتمر بضغوط تقيلة… البنى آدم اللى بجد.. يدعمها و يقولها مهما عملتى إنتى شيرين إللى بنحبها و قمر فكل حالاتك…شيرين بتستعيد ثقتها ساعدوها …الجمهور مش دوره يسمع ويتفرج و ينتقد بس…الجمهور المفروض لو لاقى النجم إللى بيحبه بيقع و محتاجه علشان يقف يسنده مش يدوس عليه. ونشر الفنان مصطفى دوريش صورة للفنانة شيرين بعد الوهاب، وكتب: "شيرين عبد الوهاب إحنا بنحبك كل الناس بتحبك هتعدي"، كما كتب النجم صبرى فواز: "شيرين عبد الوهاب بنحبك".