نجوم الفن يوجهون رسائل حب لـ "لبلبة" بندوة تكريمها.. إلهام شاهين: إنسانة جدعة وقدرت تنوع بين الكوميدى والتراجيدى والاستعراضى.. ليلى علوى: اديتى الفن كل حياتك.. محمود حميدة: يجب تسجيل شخصية نونيا فى مو

حرص عدد من نجوم الفن الحاضرين فى ندوة تكريم النجمة لبلبة، على توجيه كلمة حب لها وتهنئتها على جائزة الهرم الذهبي لإنجاز العمر التى حصلت عليها فى افتتاح مهرجان القاهرة السينمائى. فى البداية وجهت النجمة إلهام شاهين الشكر للنجم حسين فهمى على المجهود المبذول فى مهرجان القاهرة السينمائى، قائلة:" بشكر رئيس المهرجان على المجهود اللى اتعمل عشان يخرج بشكل جميل وراقى".ثم هنأت إلهام صديقتها لبلبة على التكريم، قائلة:"لبلبة أكتر إنسانة صادقة وطبيعية وجدعة جدا وصاحبة جميلة على المستوى الإنسانى وأنثى رقيقة، أكتر ممثلة قدرت تنوع بين الكوميدى والتراجدى والاستعراضى وتستاهلى التكريم وبنحبك من قلبنا يا نونيا". وقال النجم محمود حميدة:" أنا بطالب بتسجيل شخصية نونيا فى موسوعة جينيس، هى الوحيدة اللى استمرت من وهى صغيرة وكملت فى مرحلة المراهقة ولما كبرت، لأن فى أطفال لما بيبتدوا الفن وهما صغيرين مش بيكملوا وبيسبوه وفى بيتغروا بالأضواء والأموال لكن لبلبة معملتش كده وهى حالة استثنائية". أما النجمة ليلى علوى، فقالت:"بحب نونيا أوى ست تستحقى كل حب و احترام لأنك طيبة ومخلصة وفنانة شاملة واديتى الفن كل حياتك، وابتدى سجلى ذكرياتك و حياتك". لترد لبلبة على إلهام وليلى، قائلة "ليلى علوى ويسرا وإلهام شاهين أصحابى وعشرة عمرى ومنساش حبهم ليا وعشرتهم ووقفتهم معايا لما والدتى اتوفت". وقال النجم حسين فهمى:" لما قعدنا نختار مين هنكرمه السنة دى كلنا أجمعنا على النجمة لبلبة وماحدش اعترض وبقولها هى جايه متأخر"، لتقاطعة لبلبة قائلة:" هى مش جايه متأخر دى أحلى حاجه وفى شهر 8 اللى فات كلمنى حسين فى الموبايل و قالى عملت كام فيلم يا نونيا قلتله 88 فيلم قالى هتكرمى فى مهرجان القاهرة الدورة 44 و قعدت اعيط من الفرحة". وقالت النجمة سلاف فواخرجى:" قدمتى لينا فرح و سعادة و كل حاجه حلوة وشكرا من المحيط للخليج على اللى عملتيه وفى سوريا بنحبك"، لترد عليها لبلبة:" بحبك وبحب كل أهلنا فى سوريا".