نجلاء سامى أول نقيب لسائقى التوك توك فى أجرأ حوار: فى تكاتك كتير شمال وسوائقين بلطجية.. نرفض قيادة الأطفال ولدينا حملة مؤهلات عليا بيشتغلوا بدل قعدتهم.. وشعارنا "كل عيش وعامل الزبون كويس"

لم يتوقع أحد إنشاء نقابة لـ"التكاتك"، ولكنها بالفعل أنشئت فى محافظة الجيزة بمنطقة بولاق الدكرور، يرأسها نقيبة يقع على عاتقها مهام الحفاظ على أصحاب مهنة سائقى "التوك توك" وحل مشاكلهم. كاميرا فيديو7 قناة انفراد المصورة أجرت حواراً مع نجلاء سامى أول نقيب لـسائقى "التوك توك" فى مصر، جاء نصه كالتالى.. - ما هو هدف إنشاء نقابة التكاتك؟ "إحنا مش مسيطرين عليه وبيحصل جرائم كثيرة، وبيحصل تكدسات كثير فى المرور، وفى تكاتك شمال ملهاش ورق، وفى حاجات مسروقة، قولنا لازم ناخد الورق بتاع التوك توك ونشوفه ملك للشخص وبناخد صورة شخصية للشخص ونعمله ملف وبنحط للتوك توك رقم، عشان لو حصل حاجة نقدر نساعد الدولة هى تقدر تجيبه وتعاقبه وعايزين نقنن أوضاعهم ونرخصهم ونعملهم محو أمية ونرتقى بالكيان ده بدل ما إحنا سايبينه عشوائى". - كيف تم اختيار نقيب التكاتك؟ "أنا الناس اختارتنى عشان أنا أكتر حد بيساعد السواقين". - هل هناك رسوم لتسجيل عضوية النقابة؟ "لا.. عشان أنا تبع القوة العاملة، مش باخد رسوم من حد، مش عايز فلوس من حد، أنا عايزة أخدم البلد وبس، وهناك نقابات كتير فاتحة عشان تلم فلوس من الناس، ومش بتقدم خدمات، أنا مش محتاجة كدة، أنا بنزل أنا والمتطوعين نفهم الناس، ونعمل ملفات من جيبنا وبمجهونا، ومش بناخد جنيه من حد". - هل هناك قانون يحكم قيادة الأطفال تحت السن؟ "طبعاً القانون مينفعيش حد يسوق تحت سن 18سنة، والمفروض عقاب من يخالف ذلك، وأنا ضد الأطفال اللى بتسوق تحت 18 سنة لأنه يعرض حياة المواطنين للخطر، وعايزين السواقين أكبر من 18 سنة". - هل هناك تراخيص للتوك توك؟ "فى ترخيص فى مرور الجيزة وإحنا بنشتغل على كده، وبنحاول نخلى التكاتك تدخل المرور ترخص". - فى بعض السائقين من البلطجة والبعض الآخر متعلم.. هل يوجد حل لهذه المشكلة؟ "صراحة فى كتير من السواقين بلطجية، بس إحنا بنحاول نعيد تأهيلهم وتصحيح سلوكهم، عايز تأكل عيش المفروض تعامل الزبون كويس وباحترام، واللى مش هيلتزم بالقانون هيتعاقب، وهناك خريجى جامعات وحملة بكالوريوس وبدل ما يقعد على القهوة ويبقى عبء على أهله، فيضطر يركب توكتوك ويجيب مصاريفه، لحد ما ربنا يسهله بوظيفة، وفى موظفين المرتب بتاعهم قليل ومش قادر يفتح بيت، ومش عايزين يبقوا عبء على الدولة وبيشتغلوا آخر النهار سواقين توك توك". - هل فى محامين لنقابة التكاتك ؟ "آه طبعاً، عندنا مستشارين كتير، متطوعين فى النقابة للدفاع عن سائقى التوك توك المحترمين". - هل يوجد سائقى توكتوك محامين؟ "لا مفيش محامين بس فى مدرسين، وفى معاهم بكالوريوس ومش شغال فى المهنة، الكل دلوقتى بيدور عايز يفتح بيت ومفيش وسيلة، والتوك توك الوسيلة الوحيدة اللى ممكن تدخله 3 آلاف جنيه فى الشهر، ومش هيلاقيها فى أى مكان تانى". - هل هناك كارتة أو سرفيس للتكاتك؟ لا مفيش كارتة ولا سرفيس، لأنه لسه ملهوش قانون." - هل هناك تكاتك مسروق أو شمال فى كثير من المناطق؟ "يوجد تكاتك شمال كتير، بمعنى أنه مسروق من محافظات مختلفة، ولأنها غير مقننة وملهاش رخصة، الأزمة اللى إحنا قلنا عليها، بالتالى بتعمل أزمة مرورية، وفى نفس الوقت إحنا منعرفش عنه حاجة، وإحنا نطالبهم بورق التوك توك عشان نعرف الصحيح من الشمال، والمفروض الجهات المتخصصة زى الأحياء تساعدنا على كده، وتكثف حملاتها للقبض على المخالفين". - هل يوجد تأمين صحى أو اجتماعى للسائقين؟ "لو المشروع نجح هيبقى فى تأمين صحى واجتماعى على سائقى التوك توك عشان ميبقاش من سن 18 سنة، لحد ما يبقى عنده 60 سنة، وفى الآخر ياخد معاش، ودى خطوة مستقبلية إن شاء الله عقب نجاح المنظومة". - ما هى أبرز المشاكل التى تواجه سائقى التوك توك؟ "أكثر المشاكل التى تواجه سائقى التوك توك مع مسئولى الأحياء، ولكن السائقين واثقون بأن النقابة ستحافظ على حقوقهم. هل هناك اجتماع بين أعضاء النقابة؟ "نعم بنجتمع وننزل نتابع مشاكل السواقين فى الشارع، وأيه مطالبهم وبنحاول حل مشاكلهم".